Dohadaǵy arab-ıslam sammıtine qatysýshylar Izraıldiń BUU-daǵy músheligin toqtatýǵa shaqyrdy
ASTANA. KAZINFORM – Arab memleketteri lıgasy (AML) men Islam yntymaqtastyǵy uıymyna (IYU) múshe elder Qatarda ótken tótenshe sammıtte Izraıldiń Dohaǵa jasaǵan shabýylyn aıyptap, eldiń BUU-daǵy músheligin toqtatýdy usyndy, dep habarlaıdy DW aqparat agenttigi.
Sammıttiń qorytyndy málimdemesinde atap aıtqanda Izraılge qarý-jaraq satýǵa tyıym salý jáne bul memleketke qarsy sanktsııalar engizý qajettigi aıtylǵan. Sondaı-aq IYU-ǵa múshe 57 el Izraıldiń BUU-daǵy músheligin toqtatýǵa qol jetkizý úshin kelisilgen kúsh-jigerge shaqyrdy. Qatar ámiri Tamım ben Hamad Ál Tanı evreı memleketiniń Dohaǵa jasaǵan soqqysyn «qorqaq lańkestik áreket» jáne «mektepter men dıplomatııalyq ókildikter ornalasqan turǵyn aýdanǵa jasalǵan opasyz agressııa» dep sıpattady.
Sammıtke qatysýshylar budan basqa Izraıldiń Iordan ózeniniń batys jaǵalaýynda eldi mekender salýy jáne ony «genotsıd, etnıkalyq tazartý jáne asharshylyq» úshin aıyptady. Qol qoıǵandardyń pikirinshe, Izraıldiń áreketteri Taıaý Shyǵystaǵy «beıbitshiliktiń kez kelgen bolashaǵyna nuqsan keltirip otyr».
Óz kezeginde AQSh memlekettik hatshysy Marko Rýbıo dál sol kúni, 15 qyrkúıekte Vashıngtonnyń HAMAS-qa qarsy soǵysta Izraılge óz maqsattaryna jetýde qoldaý kórsetetinin rastady.
- Gaza sektorynyń halqy jaqsy bolashaqqa laıyq, biraq bul jaqsy bolashaq HAMAS joıylmaıynsha bastalýy múmkin emes. Siz bizdiń myzǵymas qoldaýymyzǵa sene alasyz, – dep málimdedi Rýbıo Ierýsalımde Izraıl premer-mınıstri Bınıamın Netanıahýmen birlesken baspasóz máslıhatynda.
Taıaý Shyǵysqa ushar aldynda tilshilermen sóılesken Rýbıo AQSh prezıdenti Donald Tramptyń Qatar aýmaǵyna jasalǵan soqqylarǵa «qýanbaıtynyn», biraq Vashıngtonnyń Izraıldi qoldaýyn jalǵastyratynyn basa aıtty.
Donald Tramptyń ózi Benıamın Netanıahýdiń «budan bylaı Qatarǵa soqqy jasamaıtynyn» málimdedi.
Aıta keteıik, Izraıl 9 qyrkúıekte Qatar astanasy Dohaǵa áýeden shabýyl jasap, nysanaǵa palestınalyq HAMAS-tyń saıası bıýrosynyń múshelerin alǵanyn málimdegen bolatyn. Soqqydan 6 adam, onyń ishinde toptyń bas kelissózshisi Halıl ál-Haııdiń uly men Qatar Іshki ister mınıstrliginiń qyzmetkeri qaza tapty.
Keıin Netanıahý Dohaǵa ne úshin soqqy jasaǵanyn aıtty.
Buǵan deıin Qasym-Jomart Toqaev Dohada Izraıl bıligi jasaǵan áskerı aktsııany aıyptaǵanyn jazǵan edik.
BUU Qaýipsizdik keńesi Dohaǵa jasalǵan soqqyny aıyptady.