Dohada júrgizýshisi bolmaıtyn taksı iske qosyldy
ASTANA. KAZINFORM — Qatardyń ulttyq kólik operatory Mowasalat (Karwa) el astanasy Dohada alǵashqy júrgizýshisiz taksılerdiń iske qosylǵanyn habarlady, dep jazady Kazinform agenttiginiń menshikti tilshisi.
Robotaksıdi Karwa mobıldi qosymshasy arqyly tapsyrys berýge bolady. Baǵyt tańdalyp, jaqyn mańda júrgizýshisiz taksı bolǵan jaǵdaıda, júıe saparǵa osy kólik túrin usynady.
Taksı kelgennen keıin de onymen ózara árekettesý — qozǵalysty bastaý, sapardy basqarý — tolyqtaı Karwa qosymshasy arqyly júzege asady.
Avtonomdy kólikti damytýdaǵy mańyzdy kezeń sanalatyn bul joba Katardyń Qatar National Vision 2030 keshendi damý baǵdarlamasy aıasynda iske asyrylyp, eldiń Kólik mınıstrliginiń baqylaýymen júzege asyp otyr.
Robotaksı — jolaýshylardyń qaýipsizdigin qamtamasyz etip, jaılylyq pen tıimdi paıdalanýdy zamanaýı avtonomdy basqarý tehnologııalary arqyly júzege asyratyn júrgizýshisiz kólik quraly.
Aıta keteıik, Dýbaıda áýe taksıi 2026 jyly iske qosylady.