Dohada ótken kezdesý biz kútken nətıje bergen joq - R.Jaqsylyqov

ASTANA. QazAqparat - 17 səýir kúni Katardyń astanasy - Dohada ótken OPEK-ke múshe jáne uıymǵa kirmeıtin elderdiń kezdesýi Qazaqstan kútken nətıjeni bergen joq. Bul týraly búgin Ortalyq kommýnıkatsııalar qyzmetiniń baspasóz məslıhatynda Qazaqstandaǵy munaı servıs kompanııalar odaǵy tóralqasynyń tóraǵasy Rashıd Jaqsylyqov məlim etti.

"Ózderińizben ótken jyly kezdesip, biraz syr tarqatqan edik. Endi 2016 jyldyń qalaı bastalǵany ózderińizge belgili. Munaı óndirýshi memleketter qataryna Iran memleketi qosyldy. Barlyǵymyzdy mazalap júrgen suraqtyń biri - munaı baǵasy qandaı bolmaq jəne memleketimizdiń damýyna ol qalaı əser etpek, sondaı-aq, bizdiń memlekettegi munaıǵa qyzmet kórsetý salasynda jasap jatqan kompanııalardyń bolashaǵy ne bolmaq degen suraq ekenin bilemin. Sondyqtan, osy suraqtarǵa tolyqqandy jaýap berý úshin búgin taǵy bas qosyp otyrmyz", - deı kele R.Jaqsylyqov Dohada ótken kezdesýdiń nətıjesine toqtaldy.

"Dohada ótken kezdesý biz kútken nətıjeni bergen joq. Sebebi, Iran memleketi munaıdyń óndirisin azaıtýǵa kelisimin bergen joq. Jyl basyn kúnine 500 myń barrelmen bastap edi, eki-úsh aıdyń ishinde munaı óndirisin kúnine 1,5 mln. barrelge jetkizdi. Jyl sońyna deıin 4 mln barrelge jetkizemiz dep otyr. Onsyzda baǵanyń teńselip turǵan kezinde artyq ónim búkil dúnıejúzilik munaı naryǵyna jaqsylyq əkelmeıtinin bilip otyrmyz. Biraq, bir aıdyń ishinde taǵy da bas qosyp, bir məmilege kelip, munaı baǵasyn turaqtandyrýǵa jumys isteımiz degen úmit bar", - dedi R.Jaqsylyqov.