Dohada Qazaqstan-Katar qarym-qatynasynyń 25 jyldyǵy atalyp ótti
DOHA. QazAqparat - Qazaqstan Respýblıkasy men Katar arasynda dıplomatııalyq qarym-qatynastyń ornaǵan aıtýly datasy Qazaqstan mýzykasynyń juldyzdary, vırtýoz skrıpkashy jáne dırıjer Marat Bısenǵalıevtiń saltanatty kontsertimen atalyp ótti, dep habarlaıdy «QazAqparat» HAA menshikti tilshisi.
Dohada «Katara Cultural Village» mádenı ortalyǵynda eki el arasyndaǵy dıplomatııalyq qarym-qatynastyń ornaǵanyna 25 jyl tolýyna oraı, maestro Marat Bısenǵalıevtiń basshylyǵymen Almaty sımfonııalyq orkestriniń kontserti ótti.
Іs-sharaǵa memlekettik organdardyń jáne úkimettik emes uıymdardyń ókilderi, dıplomatııalyq korpýs jáne Katardyń jergilikti BAQ ókilderi qatysty.
Qazaqstandyq dıplomatııa ókildiginiń basshysy Asqar Shoqybaev sózinde tyńdaýshylarǵa eki el arasyndaǵy dıplomatııalyq qatynastardyń qalyptasýy men damýynyń negizgi kezeńderi týraly aıtyp berdi.
Sondaı-aq, qatysýshylardyń nazaryna 2018 jylǵy 10 qańtardaǵy Elbasynyń Qazaqstan halqyna arnaǵan «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy jáne QR damýynyń bes jańa áleýmettik bastamasy, sondaı-aq eldiń syrtqy saıası bastamalary týraly fotokórme usynyldy.
Jalpy, jıynǵa qatysýshylar Qazaqstan men Katar arasyndaǵy dıplomatııalyq qarym-qatynasqa joǵary baǵa berip, eki el arasyndaǵy yntymaqtastyqqa tabys tiledi.
