Doha men Er-Rııad arasyn joǵary jyldamdyqty temirjol baılanystyrady

ASTANA.KAZINFORM - Qatar men Saýd Arabııasy óz astanalaryn joǵary jyldamdyqty temirjolmen baılanystyrady. Saýd Arabııasy jańalyqtar agenttiginiń habarlaýynsha, eki arab monarhııasynyń astanalary arasyndaǵy jol júrý ýaqyty shamamen eki saǵatty quraıdy, dep habarlaıdy Kazinform menshikti tilshisi.

8 jeltoqsanda Er-Rııadta Qatar ámiri sheıh Tamım bın Hamad Ál-Tanı men Saýd Arabııasynyń taq murageri sheıh Muhammed bın Salman Ál-Saýdtyń qatysýymen Saýd Arabııasy Koroldigi men Qatar memleketin baılanystyratyn joǵary jyldamdyqty elektr temirjol jobasyn júzege asyrý týraly kelisimge qol qoıý rásimi ótti.

Jobaǵa sáıkes, joǵary jyldamdyqty temirjoldyń uzyndyǵy 785 shaqyrymdy quraıdy. Ol eki astanany – Doha men Er-Rııadty baılanystyrady, sondaı-aq negizgi qalalar (Ál-Hýfýf jáne Dammam) men astana áýejaılary arqyly ótedi. Jańa jelidegi poıyzdar saǵatyna 300 km-den asatyn jyldamdyqpen júredi, bul astanalar arasyndaǵy jol júrý ýaqytyn eki saǵatqa deıin qysqartady.

Taraptar jobany alty jylda aıaqtaýdy josparlap otyr. Temirjol jylyna 10 mıllıon jolaýshyǵa deıin qyzmet kórsetedi.

Joba halyqaralyq sapa jáne qaýipsizdik standarttaryna sáıkes, jolaýshylar temirjol kóligindegi eń jańa tehnologııalar men ıntellektýaldy ınjenerııany paıdalana otyryp júzege asyrylady.

Buǵan deıin Madrıd pen Barselona arasynda joǵary jyldamdyqty poıyz qatynaıtyny habarlandy.