Doha qalasyndaǵy jarylystan 12 adam kóz jumdy
ÁBÝ-DABI. QazAqparat - Katar eliniń astanasy Doha qalasyndaǵy jarylystyń saldarynan 12 adam ajal qushty. Osyǵan baılanysty BAÁ prezıdenti sheıh Halıfa bın Zaıed Ál Nahaııan Katar ámirshisi sheıh Tamım bın Hamadý Ál Tanıǵa kóńil aıtý jedelhatyn joldady.
BAÁ basshysy qaza tapqandardyń týystaryna kóńil aıtyp, jaraqat alǵandardyń jyldam saýyǵýyn tiledi. Osy sıpattaǵy jedelhattardy BAÁ vıtse-prezıdenti, BAÁ premer-mınıstri jáne Dýbaı emıratynyń ámirshisi sheıh Muhammed bın Rashıd Ál-Maktým, BAÁ ÁQ joǵarǵy bas qolbasshynyń orynbasary, Abý-Dabı ámirliginiń hanzadasy sheıh Muhammed bın Zaıed Ál Nahaııan joldady.
Katar ІІM 27 aqpanda Doha qalasyndaǵy jekemenshik meıramhanalardyń birinde gaz ballonynyń jarylǵanyn, nátıjesinde 12 adamnyń ómiri qıylyp, 31 azamattyń túrli jaraqattar alǵany habarlanǵan edi.
Azamattyq qorǵanys departamentiniń dırektory Hamad Ál-Dýhaımı gaz ballonynyń jarylýy «Lendmark Holl» iri saýda ortalyǵynyń mańyndaǵy meıramhana ǵımaratynyń keı bólikteriniń buzylýyna ákep soqqanyn aıtty. Sondaı-aq, jarylys bolǵan jerge jaqyn mańda janarmaı quıý stansasy bolǵany habarlandy. Abyroı bolǵanda, órt ýaqytyly aýyzdyqtaldy.
