Doha-Almaty-Gonkong baǵdarymen tuńǵysh júk reısi ushyryldy
ASTANA. QazAqparat - Indýstrııa jáne ınfraqurylymdyq damý mınıstrligi Azamattyq avıatsııa komıteti Doha-Almaty-Gonkong baǵdary boıynsha tuńǵysh ret júk reısi jasalǵanyn aıtty, dep habarlaıdy QazAqparat.
«17 qańtarynda júk áýe tasymalyn damytý jáne Qazaqstandy iri avıatsııalyq hab retinde qalyptastyrý maqsatynda aımaqta tuńǵysh ret Qatar Airways áýe kompanııasynyń Doha-Almaty-Gonkong baǵdary boıynsha Boıng-777 áýe kemesimen júk reısi oryndaldy», - delingen komıtettiń Feısbýktegi paraqshasynda.
Azamattyq avıatsııa komıteti bul qadamnyń Qazaqstan úshin mańyzy zor ekenin alǵa tartady.
«Jańa baǵyt Qazaqstannyń tranzıttik áleýetin damytý boıynsha «Nurly jol» baǵdarlamasynyń maqsattary men tapsyrmalaryna saı keledi. Sonymen birge, bul jumys bizdiń el arqyly tranzıttik júk tasymalynynń ósimine jáne ekonomıkanyń qajettiligin qanaǵattandyrýǵa oń áserin tıgizedi», - dedi komıtetten.
