Doǵalatpa, bókpen, qospa: Aqsýda umyt qalǵan ulttyq taǵamdar kórmesi ótti
Dámi til úıiretin ulttyq taǵamdar baıqaýyna alty aýyldyq aımaqtan kelgen qyz-kelinshekter men aq jaýlyqty ájeler kúndelikti turmysta kóp daıyndala bermeıtin umyt qalǵan taǵamdardy usyndy.
Máselen, Bereke aýylynyń mádenı uıymdastyrýshysy Gúlsim Bekjanova bókpen, bylamyq daıyndap ákelgen.
«Bókpen - qýyrylǵan undy sútke bóktirip pisirgen taǵam, - deıdi Gúlsim Bekjanova. - Bul taǵamdy daıyndaý tásili óte qarapaıym bolyp keledi. Buǵan qosa, adam azǵasy jeńil sińiredi. Aldymen elenip tazartylǵan tary unyn otty jaılap jaǵa otyryp, qazanǵa qýyryp alǵamyz. Keıin quıryq nemese jylqy maıyn aralastyryp, ústine sút quıady. Qospa qoıýlǵansha ústine un sebelep aralastyryp otyrady. Dastarhanǵa ystyq kúıinde usynǵan durys».
Evgenevka aýyldyq aımaǵy 20 túrli dám ákelgen. Aýyl turǵyny Gúlsaraı Saǵıdoldanyń aıtýynsha, ulttyq taǵamnyń búginde umyt qalǵan túriniń biri - bylamyq óte qunarly, toıymdy taǵam. Un men etten jasalady. Aldymen undy, jarmaqty qazanǵa azdap qýyryp alyp, qoıdyń shyjǵyrylǵan ish maıy qosylady da, ústine qaınaǵan sý quıady. Budan keıin úzdiksiz aralastyryp otyryp pisiredi.
«Áıel adamnyń boıyna bitken bala kaltsııdi anasynan alady. Nátıjesinde jańa bosanǵan áıeldiń aǵzasy álsirep qalatyny belgili. Sondyqtan ertede ájelerimiz kelinderine bylamyq pisirip bergen. Al, bordama shaıdy qansonarǵa shyǵarda atalarymyz iship, kúni boıy júrgende qaryndary ashpaǵan. Sondaı-aq, jas bosanǵan analardyń tez shıraýyna septigin tıgizgen», - deıdi Gúlsaraı Saǵıdolda.
Budan basqa, ol doǵalatpa jáne un qýyrdaq taǵamdaryn ázirlegen.
Kórme qorytyndysy boıynsha úzdik atanǵandarǵa túrli syılyqtar tabys etildi. Qalqaman aýylynan Baqytjan Topjaeva «Eń úzdik baýyrsaq», Evgenevka aýyldyq okrýginen Botagóz Hýmarbergen, Gúlsaraı Saǵıdolda «Eń úzdik taǵam», Alǵabas aýyldyq aımaǵynan Bıbigúl Nurmuǵambetova «Eń úzdik qospa» pisirip, atalǵan atalymdarǵa ıe boldy.
Qyzyljar aýyldyq aımaǵynan kelgen Nurbıke Hasanova «Eń úzdik aıran», Tolǵanaı Qaıyrjanova «Eń úzdik sarymaı», Mámáıit Omarov atyndaǵy aýyldan Únzıla Qabyldınova «Eń úzdik qurt», Dostyq aýyldyq aımaǵynan Gúlsim Bekjanova «Eń úzdik irimshik» pisirip ákelgeni úshin marapattaldy.
