Dinmuhamed Qonaevtyń qaryndasy dúnıeden ozdy

ALMATY. KAZINFORM — Qazaqstan ǵylymy aýyr qazaǵa ushyrady. Dinmuhamed Qonaevtyń týǵan qaryndasy, ǵalym, mıkrobıolog, professor Raýza Qonaeva 91 jasynda ómirden ótti.

Qaraly habardy Májilis depýtaty Baqytjan Bazarbek estirtti.

Depýtat marqumnyń adamgershilik bolmysy men ustazdyq qasıetin eske aldy.

— Ol árdaıym adamǵa týra qarap sóıleıtin. Aıtar sózin oılanyp, adamǵa naqty kerek-aý deıtin sózdi taba biletin. Árdaıym jymıyp júretin, ishindegi ýaıymy men úreıin eshqashan kórsetpeıtin, — dep jazdy ol.

Raýza Qonaeva 1934 jyly Almaty oblysy Shilik aýylynda týǵan. 1952 jyly ol M. V. Lomonosov atyndaǵy Máskeý memlekettik ýnıversıtetiniń bıologııa-topyraqtaný fakýltetine oqýǵa túsip, ony 1956 jyly úzdik aıaqtady.

Sol jyldan bastap 2016 jylǵa deıin Qazaqstan Respýblıkasynyń Ǵylym akademııasynda eńbek etip, otandyq ǵylymnyń damýyna zor úles qosty.

Eske salaıyq, buǵan deıin Qazaqstan musylmandary dinı basqarmasynyń tuńǵysh Bas múftıi, qurmetti múftı Rátbek qajy Nysanbaıuly dúnıe salǵanyn jazǵanbyz.