DNK zertteýi qazaqtardyń andronovtyqtarmen jáne ǵundarmen týystyǵyn qýattady
ASTANA. QazAqparat - Qazaqstan aýmaǵynda shamamen úsh-tórt myń jyl buryn turǵan andronovtyqtarda qazaqtyń tabyn rýynda jıi kezdesetin gender jınaqtamasy bar ekeni anyqtaldy, dep jazady «Ekspress K» gazeti.
Qazaqstandyq ǵalymdar qazaqtar men ǵun jaýynger halqynyń, sondaı-aq arııler retinde tanymal andron mádenıeti ókilderiniń DNK-laryn salystyrdy. Shamalanǵandaı, bul úsh halyqtyń arasynda jaqyn týystyq baılanys anyqtalǵan.
Zertteýdi Shejire DNA jobasynyń basshysy Jaqsylyq Sábıtov júrgizdi. Batys ǵylymynda andron mádenıetiniń ókilderin arııler dep ataıdy. Aty ańyzǵa aınalǵan Arqaıym qalasyn salyp, alǵashqy eki aıaqty kúıme arbany oılap tapqan - osylar. Olardyń mádenıetiniń izderi Sibirden bastap, Úndistanǵa deıingi alyp aýmaqta kezdesedi. Ǵundar kereıit, ýaq jáne sirgeli rýlarynan shyqqan qazaqtarǵa jaqyn bolyp shyqty. Jaqsylyq Sábıtov Soltústik Qytaıdyń aýmaǵyndaǵy Egın-gol, Dýýrlık Nars jáne Barkól qorymdarynda jerlengen jaýyngerlerdiń DNK-syn zerttegen soń osyndaı pikirin jarııa etti.
Ǵundar ıeligi shamamen 4 mln. sharshy metr aýmaqty quraǵan qýatty rýly el bolǵan. Osy jaýynger salt atty kóshpelilerden qorǵaný úshin, qytaı ımperatory Tsı Shı Hýandı Uly Qytaı qorǵanyn saldy. Bizdiń dáýirimizdiń І ǵasyrynda qytaı ımperııasymen soǵysta jeńilgen kóshpeliler batysqa qaraı yǵysyp, ózderin ǵundar dep ataı bastady.
Ǵundardyń ornyn Soltústik Qytaıda jaýynger qıdan rýy basty. Olar birneshe júzdegen jyl boıy Shyǵys Azııada eń qýatty ımperııa dárejesin ustaǵan memleketti qurdy. Aqyry qıdandar shúrjenderden jeńilip, Qazaqstan aýmaǵyna yǵysyp, qazaq halqyna kelip qosyldy. Olar ózderin naımandar dep ataǵan (mońǵol tilinde «segiz» degendi bildiredi). Imperııasy gúldengen kezde qıdandardyń segiz ulysy boldy.
