Dinı teris aǵymdarǵa zańmen qatań tyıym salý kerek - depýtat

Búgin Májilistiń jalpy otyrysynda depýtat Qazybek Isa dinı teris aǵymdardyń bárine zańmen tosqaýyl qoıý máselesin kóterdi, dep habarlaıdy QazAqparat tilshisi.

«Qurmetti áriptester, dinı radıkalızmge zańmen qatań tyıym salatyn kez jetti. Óıtkeni olar ultty joıý kúresin qatty qarqynmen jalǵastyryp keledi. «Aq jol» partııasy Parlamentte talaı jyldan beri dinı teris aǵymdarǵa tosqaýyl qoıatyn zań qabyldaýdy usynyp keledi. 2011 jyly bul máseleni bılik te qolǵa alyp, barlyq mınıstrlik pen Bas prokýratýra jáne Joǵary sot ta qoldaǵan edi. Tek Ulttyq qaýipsizdik komıteti qarsy shyǵyp, osy tyıym salý baby zańǵa enbeı qaldy», - dedi Qazybek Isa Úkimetke jáne Ulttyq qaýipsizdik komıtetine joldaǵan saýalynda.

Onyń paıymynsha, qazirgi shet elge baryp, kúmándi oqýlarda birneshe aı oqyp kelgen teris aǵymdy ustanǵan «ustazdar» túrli nasıhat aıtyp júr.

«Qazir án áleminde, aıtysta, sportta da taırańdap júrgen jat aǵymnyń ókilderi dindi jamylyp alyp, áriptesteri men ánsúıer qaýymdy óz «salttaryna» kirgizip jatyr. Olardyń bul áreketterine tyıym salýymyz kerek. Dinı teris aǵymdaǵylar eldi ekige bólip, myltyqsyz-aq myńdaǵan jastarymyzdy qazaqtyń qatarynan shyǵaryp qana qoımaı, ultty joıý úshin elge qarsy qaýipti kúshterge aınaldyryp jatyr. Dinge, tilge, jerge qarsy turǵan teris aǵymdardyń bárine zańmen tosqaýyl qoıylýy tıis. Ulttyq múddemiz ben dástúrimizge, el birligine balta shaýyp, memleketke taǵy da qater tóndirip jatqan dinı teris aǵymdarǵa zańmen qatań tyıym salý qajet», - dedi depýtat.

Budan buryn habarlanǵandaı, bıyl qyrkúıek aıynda Májilis tóraǵasy Erlan Qoshanov «dombyra-haram» degenderge jaýap bergen edi.

«Meniń oıymsha, «dombyra- haram» dep júrgender ǵasyrlar boıy qolynan dombyrasyn tastamaǵan babalarymyzdy «kúnáhar» qylǵany ǵoı?! Sondyqtan halyqty adastyrýǵa jol bermeýimiz kerek. Depýtat óte oryndy saýal joldap otyr», - dedi E. Qoshanov.