Dinı nekeniń zańdy kúshi joq — mınıstrlik
ASTANA. KAZINFORM — Ádilet mınıstrliginiń resmı ókili Talǵat Ýálı vedomstvonyń baspasóz máslıhatynda dinı rásim boıynsha tirkelgen nekeniń zańdyq kúshine baılanysty pikir bildirdi.
«Konstıtýtsııanyń 1-babyna sáıkes Qazaqstan Respýblıkasy ózin demokratııalyq, zaıyrly, quqyqtyq memleket retinde bekitedi jáne onyń eń joǵary qundylyqtary adam, onyń ómiri, quqyqtary men bostandyqtary ekeni belgili.
«Neke jáne otbasy týraly» kodekstiń 2-babyna sáıkes tek arnaıy ýákiletti organdarda tirkeýden ótken neke ǵana zańdy dep tanylady. Dinı rásimder boıynsha jasalǵan nekeniń Qazaqstan Respýblıkasy aýmaǵynda zańdy kúshi joq. Sáıkesinshe mundaı neke quqyqtyq retteý tetikterimen qorǵalmaıdy. Er men áıeldiń zańdy nekede turmastan birge ómir súrýi de neke retinde tanylmaıdy. Zańdy neke quzyretti memlekettik organda resmı tirkelý kerek», — dedi ol.
Buǵan deıin Talǵat Ýálı Talǵar oqıǵasy boıynsha qandaı saraptama júrip jatqanyn aıtqan.
«Atalǵan shýly oqıǵaǵa baılanysty istiń mán-jaıyn aıta almaımyz. Sebebi ol Іshki ister mınıstrliginiń mindetine jatady. Al sot-medıtsınalyq saraptamalarǵa kelsek, 5 túrli saraptama taǵaıyndaldy. Olar: máıittiń ekspertızasy, sol jerdegi shyqqan órttiń sebepterin anyqtaý ekspertızasy, foto-tehnıkalyq ekspertıza, molekýrlıarly-genetıkalyq ekspertıza, bıologııalyq ekspertıza», — dedi ol.
