Dinı materıaldardy taratqan azamattar qandaı jaǵdaıda jaýapqa tartylady
ASTANA. KAZINFORM – QR Mádenıet jáne aqparat mınıstrliginiń Din isteri komıteti resmı saýalymyzǵa joldaǵan jaýabynda elimizde dinı materıaldardy taratqan adamdar qandaı jaǵdaıda jáne ne sebepti jaýapqa tartylatynyn túsindirdi.
Vedomstvo málimetinshe, búginde qoldanystaǵy zańnamada dinı mazmundaǵy materıaldardy ınternet resýrstarda, onyń ishinde áleýmettik jelilerde taratýdy retteý qarastyrylmaǵan.
– Alaıda quqyq qoldaný praktıkasyn eskergen jón. Komıtettiń ustanymy – azamattarǵa túsindirý jumystaryn júrgizý jáne eskertý jasaı otyryp, ákimshilik sharalardy barynsha azaıtý. Biraq qajettilik týyndaǵan jaǵdaıda, ákimshilik sıpattaǵy tıisti sharalardy qabyldaý oryndy, – delingen habarlamada.
Sonymen qatar Din isteri komıteti dinı aqparat taratqan turǵyndar jaýapqa tartylmaıtyn naqty sharttardy atady.
– Tıisti memlekettik organdar azamattardy konfessııaaralyq nemese dinı alaýyzdyqty qozdyrýǵa, ekstremızmdi nemese terrorızmdi nasıhattaýǵa ári aqtaýǵa baǵyttalǵan málimetteri joq dinı mazmundaǵy materıaldardy jarııalaǵany, dinı merekelermen quttyqtaǵany úshin jaýapqa tartpaıdy, – delingen resmı jaýapta.
Al bul sheńberden shyǵyp, qoǵamǵa iritki salýǵa, elde dúrbeleń týǵyzýǵa ákeletin áreketterge barǵandar zań aldynda jaýap beredi.
– Destrýktıvti dinı aǵymdardyń ıdeıalaryn qoldaý, konstıtýtsııalyq qurylys negizderin kúshtep ózgertý, antımádenı jáne antıulttyq messedjderdi nasıhattaý, mıtıngilerge shaqyrý, «jıhadqa» qatysýǵa úndeý, sondaı-aq konfessııaaralyq arazdyqty qozdyrý arqyly qoǵamda alaýyzdyq týdyrýǵa kesirin tıgizetin azamattarǵa qatysty tıisti sharalar qabyldanady, – dep málimdedi komıtet.
Aıta keteıik, buǵan deıin dinı qaýym ádep pen bilimdi qatar dáripteýdiń mańyzyn aıtqanyn jazǵanbyz.
