Dinı materıaldar taratqan kókshetaýlyq áıel ákimshilik jazaǵa tartyldy

Kókshetaý qalasynyń ákimshilik quqyq buzýshylyq jónindegi mamandandyrylǵan soty dinı materıaldar taratqan jergilikti turǵynǵa 50 AEK mólsherinde ákimshilik aıyppul saldy, dep habarlaıdy QazAqparat tilshisi Aqmola oblystyq PD baspasóz qyzmetine silteme jasap.

Vedomstvonyń málimetinshe, áleýmettik jelilerge monıtorıng júrgizý kezinde polıtsııa departamentiniń ekstremızmge qarsy is-qımyl basqarmasynyń qyzmetkerleri Instagram jelisinde 14 myńǵa jýyq jazylýshysy bar aqmolalyqtyń óz paraqshasynda dinı materıaldardy taratqanyn anyqtady. Bul QR Ákimshilik quqyq buzýshylyq týraly kodeksiniń 490-baby 1-bóliginiń 3-bólimshesin buzý bolyp tabylady. Ol dintaný saraptamasynyń qorytyndysymen de rastaldy.

"Kókshetaý qalasynyń ákimshilik quqyq buzýshylyq jónindegi mamandandyrylǵan sotynyń qaýlysyna sáıkes aqmolalyq áıeldiń kinási tolyq rastaldy. Oǵan 50 AEK nemese 172 500 teńge mólsherinde ákimshilik aıyppul túrinde jaza qoldanyldy", - dedi vedomstvodan.

Osy rette, tártip saqshylary dinı ádebıetterdi, dinı mazmundaǵy ózge de aqparattyq materıaldardy, dinı maqsattaǵy zattardy taratýǵa tek ǵıbadat úılerinde, dinı bilim berý uıymdarynda, sondaı-aq jergilikti atqarýshy organdar arnaıy aıqyndaǵan statsıonarlyq úı-jaılarda ǵana jol beriletinin eske salady.

Aıta ketsek, budan buryn Kókshetaýda qarjy pıramıdasyn qurǵan eki jigit 5 jylǵa sottalǵanyn jazǵan edik.