Dinı qyzmet salasyndaǵy zańnamany buzǵany úshin bıyl qansha azamat jaýapqa tartyldy
ASTANA. KAZINFORM – QR Mádenıet jáne aqparat mınıstrliginiń Din isteri komıteti resmı saýalymyzǵa joldaǵan jaýabynda dinı qyzmet salasyndaǵy quqyq buzýshylyq faktileri jóninde málimdedi.
Vedomstvo málimdeýinshe, dinı qyzmet salasyndaǵy zańnamany buzý, onyń ishinde ákimshilik jaza qoldanylǵannan keıin bir jyl ishinde qaıtadan jasalǵan áreketter úshin jaýapkershilik QR Ákimshilik quqyq buzýshylyq týraly kodeksinde qarastyrylǵan.
Atap aıtqanda, 453-babynda («Mass-medıa ónimin, sol sııaqty ózge de ónimdi QR aýmaǵynda daıyndaý, basyp shyǵarý, saqtaý, ákelý, tasymaldaý, taratý»), 489-babynda («QR qoǵamdyq birlestikter týraly zańnamasyn buzý, sondaı-aq QR zańnamasynda belgilengen tártippen tirkelmegen qoǵamdyq, dinı birlestikterdiń qyzmetine basshylyq jasaý, qatysý, olardyń qyzmetin qarjylandyrý») jáne 490-babynda («QR dinı qyzmet jáne dinı birlestikter týraly zańnamasyn buzý») aıqyn kórsetilgen.
– 2026 jyly I jartyjyldyq qorytyndysy boıynsha dinı qyzmet salasynda 147 ákimshilik quqyq buzýshylyq faktisi anyqtalǵan. Onyń ishinde ishki ister organdary jáne óńirlik Din isteri basqarmalary Kodekstiń 453-baby boıynsha 47, 489-baby boıynsha 10 jáne 490-babyn buzý boıynsha 90 faktini anyqtady, – delingen resmı jaýapta.
Aıta keteıik, buǵan deıin dinı aqparattyq materıaldardy qandaı oryndarda taratýǵa ruqsat etiletinin jazǵanbyz.
