Dinı ekstremızm men terrorızmdi nasıhattaıtyn 14 myńnan astam materıal joıyldy – Aıda Balaeva

Áleýmettik jelilerdegi radıkaldy dinı toptardan 20 myńnan astam adam alshaqtatyldy. Bul týraly Mádenıet jáne aqparat mınıstri Aıda Balaeva aıtty, dep habarlaıdy Kazinform.

«Mınıstrliktiń taǵy bir úlken jaýapty baǵyty – din salasy. Bul baǵytta bizdiń aldymyzda úsh ózara baılanysty mindet bar. Birinshisi – halyq arasyna zaıyrly memleket qundylyqtaryn nasıhattaý, ekinshisi – dinaralyq kelisimdi saqtaý, úshinshisi – dinı ekstremızmdi boldyrmaý. Osylardy iske asyrý úshin de ózara úsh tyǵyz baǵytta jumys istep kelemiz. Bul – aqparattyq-túsindirý jumystary, destrýktıvti dinı kózqarastaǵy azamattardy raıynan qaıtarý jáne ınternet arqyly dinı ekstremızm ıdeologııasyna qarsy jumystar», - dedi mınıstr Ortalyq kommýnıkatsııalar qyzmetindegi brıfıngte.

Onyń atap ótýinshe, máseleniń saldarymen emes sebebimen kúresý kerek. Sondyqtan da, dinı ekstremızm men terrorızmdi nasıhattaıtyn 14 myńnan astam zańsyz materıal joıylyp, buǵattaldy. Áleýmettik jelilerdegi radıkaldy dinı toptardan 20 myńnan astam adam alshaqtatyldy.

«Dinı ekstremızm men terrorızmniń aldyn alý, konfessııaaralyq kelisimdi nasıhattaý jáne zaıyrlylyq qundylyqtaryn nyǵaıtýǵa baǵyttalǵan 75 myńnan astam materıal BAQ-ta, tanymal áleýmettik jelilerde ornalastyryldy. Túptep kelgende qazirgi syn-qaterlerdi eskere otyryp, ýákiletti organnyń aldyna qoıylǵan mańyzdy mindetterdi iske asyrý maqsatynda, Din salasyndaǵy memlekettik saıasatty damytýdyń 2024-2028 jyldarǵa arnalǵan Tujyrymdamasynyń jobasy daıyndaldy», - dedi Aıda Balaeva.