Dinı-ekstremıstik ıdeıalardy jamylǵan 22 qylmystyq top quryqtaldy
ASTANA. KAZINFORM – Qazaqstanda jyl basynan beri dinı-ekstremıstik ıdeıalardy jamylǵan 22 qylmystyq toptyń qyzmeti toqtatylyp, olardyń quramyndaǵy 64 adam ustaldy, dep habarlaıdy Polisia.kz.
Іshki ister mınıstrliginiń málimetinshe, mundaı toptardyń músheleri bopsalaý, alaıaqtyq, tonaý, brakonerlik jáne esirtki ótkizý qylmystarymen aınalysqan. Sondaı-aq qylmystyq áreketter jasaý úshin atys qarýyn saqtaǵan.
Qylmystyq toptar Almaty qalasynda, Aqtóbe, Atyraý, Jambyl, Mańǵystaý jáne Batys Qazaqstan oblystarynda jáne elimizdiń basqa da óńirlerinde áreket etken.
Máselen, Almatyda radıkaldy dinı ıdeıalardy ustanǵan tórt adam qala turǵynynan 7,5 mln teńge urlaǵan. Sot úkimimen olar 5 jyldan 6 jylǵa deıingi merzimge bas bostandyǵynan aıyryldy.
Petropavlda radıkaldy dinı ıdeologııany ustanǵan áıel jasaǵan alaıaqtyqtyń tórt epızody ashyldy. Keltirilgen zalaldyń jalpy somasy 2 mln teńgeden asqan. Sot ony 3 jylǵa bas bostandyǵynan aıyrdy.
Pavlodarda radıkaldy dinı kózqarastaǵy jergilikti turǵynnyń alaıaqtyqtyń 17 epızodyn jasaǵany anyqtaldy. Qylmystardan kelgen shyǵyn 8 mln teńgeden asqan. Sot oǵan 5 jyl bas bostandyǵynan aıyrý jazasyn taǵaıyndady.
– Jalpy, ishki ister organdary dinı ekstremızm ıdeıalaryn ustanýshylar jasaǵan paıdakúnemdik-zorlyq sıpatyndaǵy 155 qylmysty ashty. Zańsyz aınalymnan 114 atys qarýy, 3 sýyq qarý, 7 granata, 1600-den astam oq-dári jáne 32 keliden astam esirtki tárkilendi, – delingen aqparatta.
Sonymen qatar polıtsııa ekstremıstik jáne terrorıstik qylmystardy, onyń ishinde ınternet arqyly radıkaldy ıdeologııany taratý áreketterin anyqtap, jolyn kesip jatyr.
Aqtóbede qala turǵyny áleýmettik jelilerde ózge din ókilderin qorlaý arqyly dinı arazdyqty jarııa túrde qozdyrǵany úshin 3 jyl 6 aıǵa bas bostandyǵynan aıyryldy.
Osy qaladaǵy taǵy bir jaǵdaıda zorlyq-zombylyq áreketterin josparlaǵan radıkaldy kózqarastaǵy jas jigit ustaldy. Terrorızmdi nasıhattaǵany úshin sot oǵan 6 jyl bas bostandyǵynan aıyrý jazasyn taǵaıyndaǵan.
Túrkistan oblysynda radıkaldy dinı ıdeologııany ustanǵan taǵy bir azamat ustaldy. Tergeý dereginshe, ol ınternette halyqaralyq terrorıstik uıym ıdeıalaryn belsendi túrde taratqan. Sot ony 7 jylǵa bas bostandyǵynan aıyrdy.
ІІM dinı senim qylmys pen zorlyq-zombylyqty nemese arazdyqty qozdyrýdy aqtaýǵa negiz bola almaıtynyn atap ótti. Vedomstvo qylmystyq áreketterdiń jolyn kesý jáne zorlyq-zombylyq pen dinı ústemdik ıdeologııasynyń taralýyna qarsy jumysty jalǵastyrady.
Aıta keteıik, sáýir-mamyr aılarynda terrorızm men ekstremızm úshin 13 adam sottaldy.
