Dinı aqparattyq materıaldardy qandaı oryndarda taratýǵa ruqsat etiledi
ASTANA. KAZINFORM – Mádenıet jáne aqparat mınıstrliginiń Din isteri komıteti resmı saýalymyzǵa joldaǵan jaýabynda elimizde dinı mazmundaǵy materıaldardy taratý erejeleri jóninde málimdedi.
– «Dinı qyzmet jáne dinı birlestikter týraly» QR Zańy 9-babynyń 2-tarmaǵyna sáıkes, dinı ádebıetti, dinı mazmundaǵy ózge de aqparattyq materıaldardy, dinı maqsattaǵy zattardy tek qana ǵıbadat úılerinde (ǵımarattarynda), dinı bilim berý uıymdarynda, sondaı-aq oblystardyń, respýblıkalyq mańyzy bar qalalardyń jáne astananyń jergilikti atqarýshy organdary arnaıy belgilegen turaqty úı-jaılarda taratýǵa jol beriledi, – delingen habarlamada.
Odan bólek, atalǵan zańda dinı materıaldardy Qazaqstan aýmaǵyna ákelý jáne elimizde dinı kitaptardy shyǵarý sharttary da qamtylǵan. Ol úshin atalǵan dinı eńbekterge dintaný saraptamasynyń oń qorytyndysy berilýi tıis.
– Zańnyń 9-babynyń 3-tarmaǵyna sáıkes, QR aýmaǵyna dinı ádebıetti jáne dinı mazmundaǵy ózge de aqparattyq materıaldardy dintaný saraptamasynyń oń qorytyndysyn alǵannan keıin tirkelgen dinı birlestikter ǵana ákele alady. Biraq ár ataýdyń bir danasyndaǵy jeke paıdalanýǵa arnalǵan materıaldar buǵan kirmeıdi. Sondaı-aq, atalǵan baptyń 3-1 tarmaǵyna súıenetin bolsaq, dinı ádebıetti jáne dinı mazmundaǵy ózge de aqparattyq materıaldardy ázirleýge, shyǵarýǵa jáne taratýǵa dintaný saraptamasynyń oń qorytyndysy alynǵannan keıin jol beriledi, – delingen resmı jaýapta.
Aıta keteıik, buǵan deıin jańa Konstıtýtsııadaǵy zaıyrlylyq jáne din men memleket qatynasy qalaı retteletini jóninde jazǵanbyz.
