Dnepropetrovskidegi jarylystardy uıymdastyrýshylardyń fotorobottary jasaldy
ASTANA. 30 sáýir. QazAqparat - Ýkraınanyń Qaýipsizdik qyzmeti Dnepropetrovskide bolǵan jarylystarǵa qatysy bar kúdiktilerdiń fotorobottaryn taratty.
Dnepropetrovsk oblysyndaǵy Qaýipsizdik qyzmetiniń baspasóz-toby málim etkendeı, úsh adamǵa izdeý salyndy. Olardyń aıyryqsha belgileri: birinshi kúdikti - jasy 40-ta, boıy 170 santımetr, dene bitimi ortasha, shashtary qara jáne qysqa, djınsy men qysqa jeńdi qara jeıde kıgen.
Ekinshi kúdikti - jasy 30-da, boıy 180 santımetr, dene bitimi myǵym, qara ári buıra shashty. Qara djınsy men kók tústi djınsy jeıde kıgen.
Úshinshi kúdikti - jasy 30-35-ter shamasynda. Boıy ortasha, aryqtaý kelgen, shashy qońyrlaý, artyna qaıyrylǵan. Shalbar men ashyq tústi jeıde kıgen.
Atalǵan azamattar týraly qandaı da bir málimetterdi biletin azamattar shuǵyl túrde myna telefondarǵa +380955507547 nemese dopomoga@fregat.com elektrondy poshtasyna habarlasa alady.
Búǵan deıin, qylmyskerlerdi ustap bergender úshin 250 myń AQSh dollary kóleminde syıaqy taǵaıyndalǵan bolatyn.
Esterińizge sala keteıik, 27 sáýir kúni Dnepropetrovskiniń birneshe jerinde jarylys boldy. Qoqys jáshikterine qoıylǵan jarylǵysh zattar iske qosyldy. Nátıjesinde shashamen 30 adam zardap shekti. Atalmysh áreket boıynsha QK-tiń 258-shi babynyń 2-shi tarmaǵy boıynsha (terrorıstik akt) qylmystyq is qozǵaldy. Jarylystan soń qalaǵa birden ishki ásker men bronetehnıka kirgizildi.
Qazirgi tańda Qaýipsizdik qyzmeti terrorıstik aktiniń birden 6 sebebin qarastyryp otyr. Olardyń biri, jarylǵysh zat dál osylaı qoqys jáshigine ornatylǵan - 2011 jyldyń qarasha aıyndaǵy oqıǵalarmen baılanystyrady. Ol kezde qylmysker ustatpaı ketken. Sonymen qatar ol fýtboldan Eýropa chempıonatyn boldyrmaýdy kóksep júrgenderdiń isi bolýy yqtımal degen boljam jasalyp otyr.
