Dnepropetrovskidegi jarylysta 27 adam, onyń ishinde 9 bala jaraqattandy
ASTANA. 28 sáýir. QazAqparat - Ýkraınanyń TJM bergen aqparatqa sáıkes, keshe Dnepropetrovskide oryn alǵan 4 jarylystyń saldarynan 27 adam ártúrli deńgeıde jaraqat aldy,
dep habarlady Ýkraınform.
Bul týraly Dnepropetrovsk qalasynda oryn alǵan jaǵdaıǵa baılanysty lańkestikke qarsy ortalyqtyń aqparaty qarastyrylǵan tótenshe jaǵdaıdyń deńgeıin anyqtaý boıynsha TJM sarapshy komıssııasynyń kezekten tys keńesinde aıtyldy.
«Aldyn ala jasalǵan málimetter boıynsha 27 adam, onyń ishinde 9 bala ártúrli deńgeıde jaraqat aldy. Jaraqattanǵandar qalalyq aýrýhanalarǵa jetkizildi. Jarylystyń sebepteri quqyq qorǵaý organdarymen anyqtalýda», - dep habarlady vedomstvonyń baspasóz qyzmeti.
Ýkraına prezıdenti Vıktor ıAnýkovıch osy oqıǵaǵa baılanysty Bas prokýror Vıktor Pshonkoǵa, Ýkraına qaýipsizdik qyzmetiniń tóraǵasy Igor Kalınınge jáne Іshki ister mınıstri Vıtalıı Zaharchenkoǵa tıisti tapsyrmalar berdi, dep habarlady atalmysh vedomostvonyń baspasóz qyzmeti.
Sondaı-aq Ýkraına Prezıdenti Premer-Mınıstr Nıkolaı Azarovqa jáne vıtse-premer-mınıstr - densaýlyq saqtaý mınıstri Raısa Bogatyrovaǵa, Dnepropetrovsk oblystyq memlekettik ákimshiliktiń tóraǵasy Aleksandr Vılkýlǵa zardap shekkenderge qajetti medıtsınalyq kómek kórsetip, qaladaǵy qoǵamdyq tártipti jáne turǵyndardyń qaýipsizdigin qamtamasyz etý boıynsha shara qoldanýdy mindettedi.
