Dnepr arqyly ótetin kópirdi alty aı boıy saldyq – soǵys ardageri
Jeńis kúniniń 77 jyldyǵy qarsańynda shahar basshysy eńbek ardageri Qazıza Maǵajanovanyń úıine bas suqty.
1928 jyly dúnıege kelgen keıýana búginde 94 jasqa kelip otyr.
Tarbaǵataı aýdanyna qarasty Mańyraq aýylynda týǵan ol «Eńbek ardageri», Jeńis kúnine arnalǵan 60, 65, 70 jyldyq mereıtoılyq medaldarmen marapattalǵan.
Jaqsylyq Omar ardagerdi merekemen quttyqtap, izgi tilegin arnady.
«Qazaqta sizdeı jandardy – súıegi asyl adamdar deıdi. Ǵasyrǵa jýyq ǵumyr jasap, artyńyzdan sanaly urpaq qaldyrdyńyz. Qudaı kórgen qyzyqtaryńyzdy kóbeıte bersin. Ózińizdeı kóne kóz qarııalardy kórgende qýanamyz. Aýyldaǵy óz apamyz eske túsedi. Denińiz saý bolsyn, eń bastysy. Nemere-shóberelerińizdiń qyzyǵyn kórińiz!», - dedi Jaqsylyq Omar.
Ákim Qazıza Maǵajanovaǵa gúl shoǵy men syılyq tabystady. Rızashylyǵyn bildirgen qart áje óziniń ómiri jaıly syr shertti.
«Eńbek jolymdy 15 jasynda Mańyraq aýylynda aýyldyq keńeste hatshy bolyp bastadym», - Odan keıin talaı jyldar esepshi bolyp eńbek ettim. Bizdiń zaman qıyn boldy ǵoı. Qazirgi beıbitshilik kúnge shúkir deısiń. Bala-shaǵamnyń arqasynda eshteńeden tarlyq kórip otyrǵan joqpyn», - dep eske aldy ol.
Keıýana adam attary men mańyzdy jyldardy áli kúnge deıin umytpapty. Kúni keshe bolǵandaı baıandap otyr. Búginde 2 balasynan 6 nemere, 2 shóbere súıip, qyzyqtaryn kórýde.
Qazıza apanyń Almatyda turatyn qyzy Álıden basqa balalary men nemereleriniń barlyǵy Óskemen qalasynda turady.
Sodan keıin qala ákimi marapattalǵan tyl eńbekkeri Klavdııa Gavrılkonyń úıine keldi.
1930 jyly 12 tamyzda Jarma aýdany Terentevka aýylynda kópbalaly otbasynda týǵan ardager turmystarynyń tómendiginen mektepti de bitire almaǵan.
Jastaıynan eresektermen birge kolhozda eńbek etti.
Qala ákiminiń quttyqtaýynan marqaıyp qalǵan Klavdııa Gavrılko soǵystyń qıyndyǵy týraly óleń de oqyp berdi.
Bir kózi kórmeı, eki qulaǵy durys estimeı bara jatqan qart kisiniń sanasy áli sergek eken.
«Soǵys jyldarynda jasóspirim edik. Soǵystyń barlyq aýyrtpalyǵyn sezindim. 13 jasymda traktorshy kýrstaryn jaqsy meńgerip aldym. 1944 jyly kolhozda DT-54 markaly shynjyr tabandyǵy minip, jer jyrtyp, eńbek ettim. 8 jyl traktor aıdadym. Qurylysshy da boldym. Bizdiń kórmegenimiz joq qoı», - deıdi tyl eńbekkeri.
Úshinshi bolyp Jaqsylyq Omar Ekinshi dúnıejúzilik soǵys qatysýshysy Aleksandra Saratovtsevanyń úıine taban tiredi.
1925 jyly 12 qazanda kindigi kesilgen ol 19 jasynda maıdanǵa shaqyrylǵan.
Qurylys brıgadasynda jumys istep, kópir salǵan Aleksandra Tıhonovna oq pen ottyń ortasynda júrgen.
«Dnepr arqyly ótetin kópirdi alty aı boıy saldyq. Jeńis kúnin Polshanyń Novı-Sanch qalasynda qarsy aldym. Soǵystan keıin balabaqshada, Aqtóbe qalasyndaǵy mektepte komendant bolyp jumys istedim. 2019 jyldyń aıaǵynda Óskemendegi qyzyma kóship keldim. Qazir osy qyzymnyń qolynda turyp jatyrmyn», - dedi Aleksandra Saratovtseva.
