Dinder lıderleri sezi hatshylyǵy: jasandy ıntellekttiń dinge áseri talqylandy
ASTANA. KAZINFORM – Búgin elordadaǵy Álemdik jáne dástúrli dinder lıderleri Sezi Hatshylyǵynyń XXII otyrysynda Irannyń Dinder jáne mádenıetter dıalogy ortalyǵynyń basshysy, doktor Álı Akbar Zıaı jasandy ıntellektiń múmkindikteri din jolyndaǵylar úshin kúrdeli synaq bolatynyn aıtty.
«Hatshylyq jumysy óz maqsatyna jetip otyrǵanyna senimdimin. Osy Hatshylyq otyrystarynda talqylanýy qajet taǵy bir másele – jasandy ıntellekt pen onyń keleshek urpaqqa áser etý qyrlary jáne halyqtyń nanym-senimi men ıntellektýaldyq geografııasynyń ózgerýi. Negizinde, jasandy ıntellekt aldaǵy 10 jylda orasan zor ózgeriske ushyraıdy. Dinı qoǵamdar da osy tehnologııalyq evolıýtsııaǵa beıimdelýi kerek. Sondaı-aq, jasandy ıntellekt dinı qundylyqtar, nanym-senimder sııaqty irgeli dinı qurylymdardy da ózgertedi. Bul ózgerister dástúrli din jolyndaǵylar úshin mańyzdy synaq bolmaq», - dedi Álı Akbar Zıaı.
Onyń paıymynsha, aldaǵy syn-qaterge dinı qaýymdastyqtar qarsy turý úshin júıeli josparlar bolýy kerek.
«Iran óziniń ýnıversıtetterinde, ǵylymı jáne zertteý ortalyqtarynda jasandy ıntellekt pen neıroteologııa boıynsha tabysty zertteýler júrgizdi. Biz bul jetistikterdi jaqyn arada jarııalaımyz», - dedi Irannyń Dinder jáne mádenıetter dıalogy ortalyǵynyń basshysy.
Budan buryn habarlanǵandaı, QR Senatynyń tóraǵasy Máýlen Áshimbaev jasandy zeıindi teris pıǵylda paıdalaný dinı qaqtyǵystarǵa ákelýi múmkin ekenin aıtty.
