Dinder kóshbasshylarynyń sezi rýhanı dıplomatııaǵa zor yqpal etedi – Prezıdent

ASTANA. KAZINFORM – Búgin Álemdik jáne dástúrli dinder kóshbasshylarynyń VIII Cezinde Prezıdent Qasym-Jomart Toqaev BUU basshylyǵyna rızashylyǵyn bildirdi.

Memleket basshysy sezge qurmetti qonaq retinde qatysyp otyrǵan BUU Bas hatshysynyń orynbasary – BUU Órkenıetter Alıansynyń Joǵary ókili Mıgel Anhel Moratınosqa alǵysyn aıtty. Buǵan qosa, forým aıasynda ótetin dinı nysandar men sımvolardy qorǵaý jónindegi arnaıy sessııanyń delegattaryna, Jas dinı kóshbasshylardyń ІІ forýmyna qatysatyn sarapshylarǵa rızashylyǵyn bildirdi.

- Mundaı is-sharalar rýhanı dıplomatııa salasyndaǵy sabaqtastyqty saqtaýǵa zor yqpal etetini sózsiz. Dinaralyq dıalogtyń mańyzy týraly sóz bolǵanda, marqum Rım Papasy Frantsısk týraly aıtpaı ketýge bolmaıdy. Ol 2022 jyly Astanaǵa arnaıy kelip, din kóshbasshylarynyń jetinshi sezine qatysqan edi. Bul oqıǵa forýmnyń jahandyq mańyzyn arttyra túskeni anyq. Sez jumysyna qoldaý bildirgeni úshin qasıetti Rım Papasy XIV Leoǵa shynaıy rızashylyq bildiremiz. Biz onyń dinaralyq kelisimdi nyǵaıtý jolyndaǵy bastamalaryna zor úmitpen qaraımyz, - dedi Qasym-Jomart Toqaev.

Budan buryn habarlanǵandaı, búgin elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder lıderleri VIII Ceziniń jumysy bastaldy.

Memleket basshysy Taıaý Shyǵystaǵy ahýal asa kúrdeli ekenin aıtyp, álemdik dinder kóshbasshylarynyń sezine kelgen meımandardy ashyq pikir almasýǵa shaqyrdy.