Dinder kóshbasshylary sezi: Rım Papasy XIV Leo quttyqtaý joldady
ASTANA. KAZINFORM — Rım Papasy XIV Leo elordada ótip jatqan Álemdik jáne dástúrli dinder kóshbasshylary VIII Seziniń qatysýshylaryna quttyqtaý joldady.
Rım Papasy sóz basynda Qazaqstan Prezıdenti Qasym-Jomart Toqaevqa alǵysyn bildirip, jer júziniń túkpir-túkpirinen eski dostyqty jańartýǵa jáne bólshektengen álemniń jaraqatyn jazý jónindegi ortaq maqsat biriktirgen nıettes jańa dostardy tabýǵa zor qadam jasap otyrǵanyn basa aıtty.
— «Sınergııa» óz máninde — bir-birimen de, Jaratýshymen de birlesip jumys isteýdi bildiredi. Árbir shynaıy dinı serpin ózara táýeldilikti týmysynan túsinýge negizdelgen, jeke adamdardy da, tutas ulttardy da baılanystyratyn dıalog pen yntymaqtastyqqa yntalandyrady. Osy turǵydan alǵanda, ózara úılesimdi áreketke degen umtylys tek is júzindegi tańdaý ǵana emes, sonymen birge aqıqat tártibiniń kórinisi bolyp tabylady. Bul birtutas adamzat otbasynyń músheleri retinde bizdiń birge bolýymyzdyń mánine sáıkes keledi. Osyny uǵyný bizdiń ar-ojdanymyzdyń tereń túkpirinde shynaıy yntymaqtastyq sezimin týdyrady — biz bir-birimiz úshin jaýap beremiz degen senim oıanady. Osylaısha, yntymaqtastyq — bul is-árekettegi sınergııa: kórshisine degen súıispenshilik týraly ósıetti jahandyq aýqymda júzege asyrý, — dedi ol.
Rım Papasy mundaı yntymaqtastyq aıyrmashylyqty joıýǵa emes, kerisinshe, alýandyqty ózara baıytý kózi retinde qabyldaýǵa shaqyrý ekenin atap ótti. Sondaı-aq ol 2019 jyly Abý-Dabıde Rım Papasy Frantsısk pen Al-Azhardyń Uly ımamy Ahmad ál-Taıeb qol qoıǵan Jalpyǵa ortaq beıbitshilik jáne birge ómir súrý jolyndaǵy adamnyń baýyrlastyǵy týraly qujat dinı sınergııanyń jahandyq beıbitshilik pen qatar ómir súrýge qalaı yqpal etetini týraly naqty jol kartasyn usynǵanyn nazar aýdartty.
— 2022 jyly ótken Sezd otyrysynda biz dál osyndaı rýhanı oqıǵanyń kýási boldyq. Onda ártúrli dinderdiń jetekshileri, onyń ishinde Rım Papasy Frantsısk zorlyq-zombylyq pen ekstremızmdi aıyptaý, bosqyndardy qorǵaý jáne búkil kóshbasshylardy beıbitshilik jolynda birlesip jumys isteýge shaqyrý úshin jınaldy. Ol málimdeme joǵary deńgeıdegi naqty is-áreketterde kórinis tapty: tabıǵı apattar bolǵan kezde, bosqyndar úılerinen ketýge májbúr bolǵan kezde, otbasylar óte kedeılik pen ashtyqtan zardap shekkende — dinı qaýymdastyqtar jıi bas qosty, ıyq tiresip, muqtaj adamdarǵa úmit pen jeńildik ákeldi. Biz umtylǵan bolashaq — beıbitshilik, baýyrlastyq pen yntymaqtyń bolashaǵy — bilekterdiń birigýi men júrekterdiń jylylyǵyn talap etedi. Dinı lıderler qoǵamnyń eń osal múshelerin qorǵaý isinde birge turyp, ortaq úıimizge qamqorlyq jasaý nıetimen aǵash otyrǵyzǵanda nemese adamnyń qadir-qasıetin qorǵaý úshin birge ún qatqanda olar aqıqatty dáleldeıdi: senim adamdardy alshaqtatpaıdy, qaıta toptastyrady. Sınergııa osylaısha, kúlli adamzatqa qýatty úmitke aınalady, bul dinderdiń túpki maǵynasy qaqtyǵys emes, arylý men tatýlasýdyń qaınar kózi ekenin kórsetedi, — dedi Rım Papasy.
Astanada Álemdik dinder kóshbasshylarynyń sezi ótip jatyr.
Іs-shara barysynda Qasym-Jomart Toqaev din basshylaryn beıbitshilik elshileri dep atady.