Din salasyndaǵy memleket saıasatyn damytýdyń 5 jyldyq tujyrymdasy ázirlenýde
Din salasyndaǵy memleket saıasatyn damytýdyń 2024-2028 jyldarǵa arnalǵan tujyrymdamasy ázirlenip jatyr. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Ekstremızm men terrorızmge qarsy is-qımyldyń memlekettik júıesin damytýdyń 2023-2025 jyldarǵa arnalǵan keshendi jospary (budan ári – Keshendi jospar) júzege asýda. Vedomstvoaralyq úılestirýdi jetildirý, ekstremızmge qarsy is-qımyl jónindegi qosymsha sharalar keshenin ázirleý, jeke tulǵany, qoǵamdy jáne memleketti zorlyq-zombylyq sıpatyndaǵy ekstremıstik kórinisterden jáne terrorızm qaterlerinen senimdi qorǵaýdy qamtamasyz etý jónindegi is-sharalar júrgizilýde. Týrızm jáne sport mınıstrligi Іshki ister mınıstrligimen, Ulttyq qaýipsizdik komıtetimen, Bas prokýratýramen jáne ózge de múddeli memlekettik organdarmen birlesip, sport salasynda destrýktıvti dinı ıdeologııanyń taralýyna jol bermeý jónindegi Jol kartasynyń jobasyn ázirledi», - dep atap ótedi Úkimet basshysy jaýabynda.
Premer-Mınıstrdiń atap ótýinshe, qazirgi zamanǵy syn-qaterlerdi nazarǵa ala otyryp, Úkimet deńgeıinde júıeli sharalardy talqylaý jáne ázirleý maqsatynda Qazaqstan Musylmandary dinı basqarmasy basshylyǵymen, sondaı-aq belgili teologtarmen jáne óńirlik sarapshylar tobymen kezdesýler ótkizildi. Onda aǵymdaǵy dinı ahýal, problemalyq máseleler jáne olardy sheshý joldary talqylandy.
«Kezdesýler jáne aıtylǵan usynystardyń nátıjeleri boıynsha Qazaqstan Respýblıkasynyń din salasyndaǵy memlekettik saıasatyn damytýdyń 2024-2028 jyldarǵa arnalǵan tujyrymdamasy ázirlenýde», - dedi Álıhan Smaıylov.
