Din ekstremızmge tosqaýyl bolý kerek – Dúnıejúzilik ıslam lıgasynyń bas hatshysy

ASTANA. KAZINFORM – Dúnıejúzilik ıslam lıgasynyń bas hatshysy Sheıh Muhammed ben Abdýlkarım Ál-Isa Kazinform tilshisine bergen suhbatynda dinaralyq tatýlyqtyń qazirgi álemdegi róli týraly paıymdaryn aıtty.

– Astanadaǵy Álemdik jáne dástúrli din kóshbasshylarynyń sezinen sizdi kórgenimizge qýanyshtymyz. Bul alań dinder arasyndaǵy dıalogke qalaı yqpal etip otyr dep oılaısyz? 

– Bul alań arqyly din kóshbasshylary álemdegi ózekti máselelerdi sheshýge óz úlesterin qosa alady. Din kóshbasshylarynyń dinder arasyndaǵy túsinistikti nyǵaıtýdaǵy róli orasan. Túrli nanymdaǵy adamdar tutastyq jolynda birlesip eńbek etýine osyndaı biregeı dıalog alańdary kóp septigin tıgizedi.

Osyndaı mańyzdy sharany ótkizip kele jatqan Qazaqstanǵa, onyń Prezıdentine alǵysymyz sheksiz. Sezge memleket basshysynyń ózi qatysýy qosymsha bedel men jahandyq mańyz ústeıdi.

– Qazirgideı kıkiljińder men gýmanıtarlyq apattar jıilegen kezeńde din kóshbasshylary toleranttylyq pen ózara túsinistikti nyǵaıtý jolynda ne isteý kerek dep oılaısyz?

– Din kóshbasshylary sózine qulaq asatyn din ustanýshy qaýymnyń sanasyna áser etý arqyly beıbitshilik pen toleranttylyq mádenıetin ornyqtyrýǵa yqpal ete alady. Bul mıssııa kıkiljińderge shyn nıetińmen qarsy turýdan bastalady.

Naǵyz dinı aǵartý adamı, rýhanı qundylyqtardy basshylyqqa alady. Álemdegi mıllıondaǵan adam din kóshbasshylarynyń sózine qulaq asady. Sol arqyly olar qoǵamda kózqarastar qalyptastyrady.

Dúnıejúzilik ıslam lıgasy da álemdegi túrli dinı qaýymdardyń ókilderimen dıalog ornatqan. Sol yntymaq arqyly ekstremıstik ıdeologııalarǵa qarsy turyp kelemiz. Naǵyz dinniń ekstremızmmen úsh qaınasa sorpasy qosylmaıdy. Biz din ustanýshy qaýymǵa osyny jetkizýge kúsh salamyz. Din nanymnyń alýan túrli bolǵanyna qurmetpen qaraımyz. Biraq ekstremızmniń kez kelgen formasyna úzildi-kesildi qarsymyz. Óıtkeni mundaı ıdeologııa qaqtyǵys pen shetsiz-sheksiz kıkiljińnen basqa eshteńege ákelmeıdi.

Naǵyz nanym dıalog arqyly, ashyq suhbat arqyly týyndaıdy. Dál osyndaı ashyq dıalog arqyly dinder arasyna kópir jalǵap, ózara yntymaqqa, qol jetkize alamyz. Sonda ǵana qoǵamda kelisim ornap, beıbitshilik ústemdik qurady.

Buǵan deıin Prezıdent Qasym Jomart Toqaevtyń Álemdik jáne dástúrli dinder kóshbasshylary VIII Ceziniń jalpy otyrysynda sóz sóılep, din basshylaryn beıbitshilik elshileri dep ataǵanyn jazǵan edik.