Dmıtrıı Vasılev aıyna 4 mıllıon teńge jalaqy alyp otyrǵan
AQTÓBE. QazAqparat - Búgin №2 Aqtóbe qalalyq sotynda «Aqtóbe» FK burynǵy bas dırektory Dmıtrıı Vasılev pen oblystyq dene shynyqtyrý jáne sport basqarmasynyń basshysy qyzmetin atqarǵan Eskendirbek Mahanovqa qatysty sot otyrysy bastaldy, dep habarlaıdy QazAqparat tilshisi.
«Aqtóbe» fýtbol klýbyndaǵy jemqorlyqty áshkereleıtin sot otyrysynda búgin oblys prokýrorynyń kómekshisi Elýbek Talasov aıyptaý qorytyndysyn oqydy. Іs materıaldaryna súıensek, klýbtyń burynǵy bas dırektory Dmıtrıı Vasılev 2016 jyldyń naýryz-qarasha aılarynyń arasynda óz betimen syıaqy taǵaıyndap, jemqorlyqqa jol bergen.
«Dmıtrıı Vasılev «Aqtóbe» FK bas dırektory qyzmetin atqara júrip, birneshe zańsyzdyqqa jol berdi. Ol bas dırektor qyzmetine 2015 jyldyń jeltoqsan aıynda taǵaıyndalǵan bolatyn. Mindeti - uıymdastyrýshylyq, óndiristik-sharýashylyq, qarjylyq jumystardy atqarý. Barlyq jumys týraly jan-jaqty jazylyp, oblystyq dene shynyqtyrý jáne sport basqarmasynyń basshysy Eskendirbek Mahanovqa esep berýge, akt tapsyrýǵa mindetti. Ótken jyly fýtbol klýbynyń jumysyna 2 mıllıard teńge bólingen. Atqarylǵan jumystardyń oryndalǵanyn, oryndalmaǵanyn tekserýi tıis E.Mahanov eshteńege mán bermeı, 2016 jyldyń naýryz-qyrkúıek aılary aralyǵynda «Memlekettik satyp alý» kelisimsharty boıynsha 1 mıllıard 665 mıllıon 679 myń teńgeni esh kedergisiz aýdarǵan. Sóıtip, Vasılevtiń bıýdjet qarjysyn kedergisiz jumsaýyna jaǵdaı jasady»,- dedi prokýror sot otyrysy kezinde.
Sot otyrysy kezinde oblystyq dene shynyqtyrý jáne sport basqarmasynyń burynǵy basshysy A.Qulmaǵambetov qyzmetinen ketip, Mahanov jumysqa ornalasqan soń ol ózin «Aqtóbe» FK» AQ-nyń múshesi etip tirkegen. Qoǵam múshesi retinde ol ótken jyly «Býdapesht-Aqtóbe», «Atyraý-Aqtóbe» oıyndaryna qatysyp, fýtbolshylarmen birge arnaıy reıs arqyly sol qalalarǵa baryp, memleket qarjysyn talan-tarajǵa salǵan. Sóıtip, 1 mıllıon 94 myń teńgeden astam shyǵyn keltirdi.
Іs materıaldaryna súıensek, «Aqtóbe» FK» AQ qyzmetkerlerine beriletin syıaqy mólsherin dırektorlar keńesi sheshýi tıis eken. 2015 jyly syıaqy bólý týraly qujat qaralǵanymen, 2016 jyly dırektorlar keńesi bul týraly sheshim shyǵarý artyq dep tapqan. Sebebi, 2016 jyldaǵy fýtbol maýsymy kezinde «Aqtóbe» komandasyna joǵary mindet júktelmedi, jeńimpazdar qatarynan tabylý týraly meje qoıylmady.
«Bul sheshim týraly D.Vasılev bilgen jáne bile tura syıaqy taǵaıyndaǵan. Sóıtip, klýb músheleriniń bank esepshotyna 240 mıllıon 840 myń teńge aqsha aýdarǵan. Onyń ishinde bas dırektor retinde ózine 21 mıllıon 150 myń teńge bólgen»,- dedi prokýror Elýbek Talasov.
Al dırektorlar keńesine ózin zańsyz qosyp alǵan Eskendirbek Mahanov aı saıyn 350 myń teńge alýy tıis bolǵan bas dırektor Dmıtrıı Vasılevke 4 mıllıon teńge jalaqy taǵaıyndaǵan.
«Bas dırektordyń aılyǵy 4 mıllıon teńge bolǵan. Sóıtip, 2015 jyldyń jeltoqsanynan 2016 jyldyń qazanyna deıin Vasılevke 40 mıllıon 315 myń teńge aýdarylǵan. Shyǵyn - 36 mıllıon 500 myń teńge. Sonymen qatar, 2016 jyldyń shilde aıynda taǵy 10 mıllıon 980 myń teńge syıaqy bergen»,- dedi prokýror.
Búgingi sot otyrysy kezinde Dmıtrıı Vasılev pen Eskendirbek Mahanov ózderine taǵylǵan aıyppen múldem kelisken joq. Tipti, Dmıtrıı Vasılev isti qysqartý týraly ótinish joldady.
Eske salsaq, «Aqtóbe» FK burynǵy bas dırektory Dmıtrıı Vasılev Qylmystyq kodekstiń «Senip tapsyrylǵan bóten múlikti ıemdenip alý nemese talan tarajǵa salý» baby boıynsha, al oblystyq dene shynyqtyrý jáne sport basqarmasy basshysynyń qyzmetin atqarǵan Eskendirbek Mahanov «Senip tapsyrylǵan bóten múlikti ıemdenip alý nemese talan tarajǵa salý», «Bılik nemese laýazymdylyq ókilettilikterdi asyra paıdalaný» baptary boıynsha aıyptalyp jatyr .
