Dmıtrıı Popko Meksıkadaǵy jeńisti jolyn jalǵastyrdy
ASTANA. KAZINFORM – Qazaqstandyq, álemniń 175-raketkasy Dmıtrıı Popko Morelos (Meksıka) chellendjer týrnıriniń ekinshi aınalymyna shyqty.
Qazaqstandyq tennısshi alǵashqy aınalymda álemniń 152-inshi, osy jarystyń 5-raketkasy, brazılııalyq Felıpe Melıgenı Alvespen kezdesti.
Birinshi partııada Popko 6:3 esebimen basymdylyq tanytsa, ekinshisinde taı-breıkte sátti oınady – 7:6 (7:2).
Saǵat jarymnan astam ýaqytqa sozylǵan báseke barysynda D.Popko 8 eıspen birge 8 breık-poınttyń ekeýin paıdalandy. Alves 9 eıs, 1 breıkpen (4 breık-poınt) kózge tústi.
Dmıtrıı Popko shırek fınalǵa shyǵý úshin álemniń 321-raketkasy, amerıkalyq Maksım Kressı nemese reıtıngide 497-oryndaǵy germanııalyq Maks Vıskandttyń qaı jeńgenimen talasady.
Buǵan deıin Morelııadaǵy dál osyndaı týrnırde jeńimpaz atanǵan D.Popko Meksıkadaǵy jeńis serııasyn 6 matchqa jetkizdi.
Taǵy bir qazaqstandyq, reıtıngide 192-satydaǵy Beıbit Juqaev Morelosta álemniń 162-inshi, dodanyń 2-raketkasy, kanadalyq Aleksıs Galarnoǵa tap keldi.
Úsh saǵat 2 mınýtqa sozylǵan tartysty oıynda B.Juqaev 6:7 (7:9), 7:6 (12:10), 3:6 esebimen jeńilis tapty. B.Juqaev 24 eıs jasaǵanymen, 12 breık-poıntty paıdalana almady.
Júlde qory 100 myń AQSh dollaryna baǵalanǵan Morelos jarysy 6 sáýirde máresine jetedi. Jeńimpaz 14 200 dollar tabys taýyp, 75 reıtıngilik upaıǵa qol jetkizedi.
Qazaqstandyq Tımofeı Skatov Býharest (Rýmynııa) ATP 250 týrnıriniń alǵashqy aınalymynda qazirgi kezde reıtıngide 161-orynda turǵan «Úlken dýlyǵa» jarysynyń úsh dúrkin jeńimpazy, 2008 jylǵy Olımpıada chempıony, shveıtsarııalyq, 40 jastaǵy Sten Vavrınkaǵa jol berdi – 4:6, 7:6 (7:5), 6:7 (1:7). Báseke 3 saǵat 16 mınýtqa sozyldy. Bul S.Vavrınkanyń bıylǵy maýsymdaǵy ATP deńgeıindegi alǵashqy jeńisi edi.
Reıtıngide 245-satydaǵy Denıs Evseev Menorka (Ispanııa) chellendjer týrnıriniń alǵashqy aınalymynda álemniń 145-raketkasy, ıspanııalyq Karlos Tabernerge ese jiberdi – 2:6, 6:4, 1:6.
Eske sala keteıik, budan buryn Tımofeı Skatovtyń Býharestte negizgi týrnırge ótkenin jazǵan edik.
Jasóspirimder arasynda álem chempıonatynda qazaqstandyq tennısshilerdiń qarsylasy anyqtaldy.