Dmıtrıı Popko Meksıkada jarystyń 4-raketkasyn jeńip, jartylaı fınalǵa shyqty

ASTANA. KAZINFORM — Qazaqstandyq tennısshi, álemniń 275-raketkasy Dmıtrıı Popko Morelııa (Meksıka) chellendjer týrnıriniń jartylaı fınalyna ótti.

Qazaqstandyq sportshy shırek fınalda álemniń 117-inshi, osy jarystyń 4-raketkasy, argentınalyq Tıago Agýstın Tırantemen betpe-bet keldi.

Birinshi partııada Popko bet qaratpady – 6:1.

Ekinshi sette qazaqstandyq tennısshi birden breık jasap, 2:0 esebimen alǵa ketti. Aqyry matchty jeńispen túıindedi – 6:4. 

Bir saǵat 10 mınýtqa sozylǵan báseke barysynda Dmıtrıı 2 eıspen birge 5 breık-poınttyń úsheýin paıdalandy. Tırante 3 eıspen shekteldi.

Dmıtrıı Popko fınalǵa shyǵý úshin álemniń 204-raketkasy, frantsııalyq Ýgo Grenemen talasady. Ol reıtıngide 219-satydaǵy aýstralııalyq Bernard Tomıchti joldan taıdyrdy - 2:6, 7:6 (7:4), 6:2

Taǵy bir qazaqstandyq, reıtıngide 175-satydaǵy Tımofeı Skatov Jırona (Ispanııa) chellendjer dodasynyń shırek fınalynda álemniń 108-raketkasy, serbııalyq Dýshan Laıovıchke 2:6, 4:6 esebimen jol berdi. Sóıtip jartylaı fınaldan tys qaldy. 

Eske sala keteıik, budan buryn Tımofeı Skatovtyń Ispanııadaǵy týrnırde tórtinshi kezdesýin jeńispen túıindegenin jazǵan edik.

Sondaı-aq Dmıtrıı Popko Meksıkadaǵy jarystyń shırek fınalyna joldama aldy.