Dmıtrıı Popko Argentınadaǵy jarystyń fınalynda jeńilis tapty

Qazaqstandyq, álemniń 417-raketkasy Dmıtrıı Popko Argentına astanasy Býenos-Aıreste ótken chellendjer týrnıriniń fınalynda oınady, dep habarlaıdy Kazinform. 

Jarysty irikteý saıystarynan bastap fınalǵa deıin jetken qazaqstandyq tennısshi sońǵy básekede dúnıejúzilik reıtıngide ózinen eki saty joǵary turǵan 19 jastaǵy Perý ókili Gonsalo Býenomen bas júlde úshin talasty.

Birinshi partııada perýlik tennısshi 6:4 esebimen basym tústi.

Esesine ekinshi sette qazaqstandyq sportshy qarymta qaıyrdy – 6:2.

Úshinshi, sheshýshi partııada G.Býeno 3:0, 4:1 esebimen alǵa shyqqanymen, D.Popko tarazy basyn teńestirdi – 4:4. Esep 6:5 bolǵan mezette ol úsh matchbolyn paıdalana almady. Taı-breıkte sáttilik G.Býenonyń jaǵynda boldy – 7:6 (7:4).

Eki saǵat 30 mınýtqa sozylǵan tartysty báseke barysynda Popko 2 eıspen birge 13 breık-poınttyń jeteýin múlt jibergen joq. Qarsylasy 1 eıs, 6 breıkpen (12 breık-poınt) kózge tústi.

Dmıtrıı Popko Býenos-Aıreste irikteý saıystaryn qosqanda, barlyǵy 6 jeńiske qol jetkizdi.

Qazaqstandyq tennısshi osy tabysy arqasynda ATP Live reıtıngisinde birden 358-orynǵa kóterilip tur.

Eske sala keteıik, budan buryn Aýstralııa ashyq chempıonatynda qazaqstandyq tennısshilerdiń qarsylastary kimder ekendigin jazǵan bolatynbyz.

Sondaı-aq qazaqstandyq tennısshi Ispanııadaǵy týrnırde alǵashqy jeńisine qol jetkizdi.