Dmıtrıı Popko AQSh ashyq chempıonatynyń irikteý saıysyn sátti bastady
NUR-SULTAN. QazAqparat – Qazaqstandyq Dmıtrıı Popko AQSh ashyq chempıonatynyń irikteý saıysyn sátti bastady, dep habarlaıdy QazAqparat tilshisi.
Dúnıejúzilik reıtıngide 236-orynda turǵan D.Popko bastapqy matchyn álemniń 170-raketkasy, ıtalııalyq Andrea Pellegrınomen ótkizdi.
Birinshi partııada ıtalııalyq sportshy basym tústi – 6:4.
Ekinshi sette D.Popko 2:0 esebimen alǵa ketkenimen, qarsylasy tarazy basyn teńestirdi. Degenmen taı-breıkte qazaqstandyq tennısshi sátti oınady – 7:6 (7:3). Úshinshi – sheshýshi partııada Popkonyń qulashy jazyla tústi – 6:2.
Eki saǵat jarymǵa sozylǵan básekede Dmıtrıı 7 eıs jasap, 12 breık-poınttyń úsheýin paıdalandy. A.Pellegrıno 3 eıs, 2 breıkpen (5 breık-poınt) shekteldi.
D.Popko irikteý saıystarynyń jartylaı fınalynda álemniń 114-raketkasy, slovakııalyq Norbert Gomboshpen kezdesedi.
Taǵy bir qazaqstandyq, álemniń 215-raketkasy Mıhaıl Kýkýshkın búgin reıtıngide 235-satydaǵy argentınalyq Nıkolas Kıkermen kortqa shyǵady.
Qazaqstannyń juptyq syndaǵy birinshi, álemniń 20-raketkasy Anna Danılına Klıvlend (AQSh) WTA 250 týrnıriniń shırek fınalyna shyqty. Jarystyń 4-raketkasy bolyp tirkelgen A.Danılına serbııalyq Aleksandra Krýnıchpen birge alǵashqy aınalymda amerıkalyqtar Medıson Brengl – Loren Devısti tize búktirdi – 7:6 (7:5), 2:6, 10:7.
A.Danılına men A.Krýnıch jartylaı fınalǵa shyǵý úshin japonııalyq Mııý Kato – ındonezııalyq Aldıla Sýtdjıadımen talasady.
Eske sala keteıik, budan buryn qazaqstandyq 6 jasar tennısshiniń Rafael Nadal akademııasy týrnıriniń fınalısi atanǵanyn jazǵan bolatynbyz.
Sondaı-aq qazaqstandyq tennısshi Taıland týrnırin jeńispen bastady.
