Dmıtrıı Ogaı Almaty qalasynyń "Qaırat" fýtbol klýbynyń bas bapkeri bolyp taǵaıyndaldy
ALMATY. 24 jeltoqsan. QazAqparat /Erlik Erjanuly/ - Jańa maýsymda Birinshi lıgada óner kórsetetin Almatynyń "Qaırat" fýtbol klýbyn endi Dmıtrıı Ogaı jattyqtyratyn boldy.
Almatylyqtardyń demeýshisi sanalatyn "QazRosGaz" JShS-niń bas dırektory Qaırat Boranbaev 22-beısenbide komandaǵa resmı túrde jańa bas bapkerdi tanystyrdy. Bıylǵy maýsymda Premer-Lıgada súreńsiz oıyn órnegimen kózge túsken almatylyqtar Birinshi lıgaǵa túsip qalǵan bolatyn. Klýbtyń ǵalamtordaǵy saıtynda jarııalanǵan habarlamaǵa qaraǵanda, komanda basshylyǵy D. Ogaımen 2+1 júıesi boıynsha kelisim-shart jasasqan. "Qaıratty" tyǵyryqtan alyp shyǵatyn bolsa qazaqstandyq bapker 2 jyldan keıin kelisim-shart merzimin taǵy uzartýǵa múmkindigi bar.
Komandany buǵan deıin jattyqtyryp kelgen sheteldik bas bapker Djon Charlz Gregorımen 19 jeltoqsanda eńbek kelisim-sharty buzylǵan bolatyn. "Qaırattyń" qazaqstandyq jańa bas bapkeri Dmıtrıı Alekseevıch 2002, 2005 jyldary Qazaqstannyń úzdik jattyqtyrýshysy atanǵan bolatyn. Bapkerlik mansabynda 2000-2001 jyldary Qyzyljardyń «Esil-Bogatyr», 2002-2004 -Pavlodardyń «Ertis», 2005-2009 jyldary Qostanaıdyń «Tobyl», 2010 jyly Tarazdyń "Taraz", 2011 jyly Reseıdiń Ekaterınbor qalasynyń "Ýral" komandasyn jattyqtyrdy. «Valensııa», «Aıaks», «Barselona», «Rýbın" sııaqty eýropalyq komandalarda bapkerlik tájirıbeden ótken ol el chempıonatynda 2000 jyly qyzyljarlyqtardy kúmis júldeger, qostanaılyqtardy 3 ret kúmis, 1 ret qola júldeger jáne 2007 Qazaqstan kýbogynyń jeńimpazy etip, 2002-2003 jyldardaǵy maýsymda pavlodarlyqtardy el chempıony jasady.
1960 jyly 14 mamyrda Taraz qalasynda ómirge kelgen D. Alekseevıch 1980, 1986-88 jyldary Almatynyń «Qaırat»; 1981-83 jyldary Tashkenttiń "Pahtakor»; 1986, 1989 jyldary Jambyldyń «Hımık»; 1990-91 jyldary Qaraǵandynyń «Shahter» komandasynyń oıynshysy boldy. Sondaı-aq ár jyldary Almatynyń «Dostyq» (Alma-Ata), Aqtóbeniń «Aktıýbınets», Aqtaýdyń «Munaıshy» jáne Germanııanyń «Proıssen Hameln-07» komandalarynda da óner kórsetip, aıaqtoptaǵy oıynshy mansabyn 38 jasynda týǵan qalasynda aıaqtady.
