Dmıtrıı Medvedev esirtkiniń zańsyz aınalymyna qarsy kúres ortalyǵyn qurý týraly zańǵa qol qoıdy
ASTANA. 9 naýryz. QazAqparat - Reseı Federatsııasynyń prezıdenti Dmıtrıı Medvedev esirtki zattarynyń zańsyz aınalymymen kúresý jónindegi Ortalyq Azııa Úılestirý ortalyǵyn qurý jónindegi kelisimdi ratıfıkatsııalaý týraly zańǵa qol qoıdy.
Bul týraly Kremldiń baspasóz qyzmeti habarlaıdy.
«Dmıtrıı Medvedev esirtki quraldarynyń, psıhotroptyq zattardyń jáne olardyń prekýrsorlarynyń zańsyz aınalymymen kúresý boıynsha Ortalyq Azııa aımaqtyq aqparattyq Úılestirý ortalyǵyn qurý týraly Qazaqstan Respýblıkasy, Ázirbaıjan Respýblıkasy, Qyrǵyz Respýblıkasy, Reseı Federatsııasy, Tájikstan Respýblıkasy, Túrikmenstan jáne Ózbekstan Respýblıkalary arasyndaǵy Kelisimdi ratıfıkatsııalaý týraly zańǵa qol qoıdy», - delingen habarlamada.
Federaldi zańdy Memlekettik Dýma 2011 jyldyń 22 aqpanynda qabyldap, Federatsııa Keńesi 2011 jyldyń 2 naýryzynda maquldady.
