Dmıtrıı Balandınniń kóliginiń aınasyn urlaǵan jigit sottaldy
ALMATY. QazAqparat – Almatyda Olımpıada chempıony Dmıtrıı Balandın kóliginiń aınasyn urlaǵan Aıdos Ýálıevtiń bas bostandyǵy 4 jylǵa shekteldi, dep habarlaıdy QazAqparat tilshisi sot zalynan.
№2 Almaly aýdandyq sotynyń sýdıasy Kámshat Sáýirova Aıdos Ýálıevti QR QK 188-baby boıynsha aıypty dep taýyp, 4 jylǵa bas bostandyǵyn shekteý týraly úkim shyǵardy.
«Sottalýshy Aıdos Ýálıevtiń aıyby tolyq dáleldendi dep sanaımyn. Alaıda onyń buryn sottalmaǵanyn, qartaıǵan ata-anasynyń bar ekenin, is boıynsha shyǵynnyń joqtyǵy eskerildi. Sol sebepti sottalýshynyń 4 jylǵa bas bostandyǵy shektelsin. Sottalýshy sot zalynan bosatylsyn. Probatsııalyq baqylaý ornatylsyn», - dedi úkimdi oqyǵan sýdıa.
Jábirlenýshiler belgili Olımpıada chempıony Dmıtrıı Balandın men Almaty turǵyny Raýanbek Qýanov. Sottalýshy ekeýiniń kóliginen aınalaryn urlap ketken.
Aldyńǵy sot otyrysynda sottalýshy jábirlenýshilerge keltirilgen materıaldyq shyǵyndy tolyǵymen ótegen bolatyn.
Buǵan deıin prokýror ony 3 jylǵa bas bostandyǵynan aıyrýdy suraǵan bolatyn.
Eske sala keteıik, oqıǵa 1 sáýirde bolǵan. Qurmanǵazy men Baıseıitova kósheleriniń qıylysynda Olımpıada chempıony Dmıtrıı Balandınniń Toyota Land Cruiser kóliginiń aınasyn bireýler urlap ketken bolatyn.
Osydan bir jyl buryn sol jerde Denıs Tenniń kóliginiń aınasyn urlaǵandar sportshyny pyshaqtap ketti, ol keıin aýrýhanada kóz jumdy.
