Dmıtrıı Balandın kóliginiń aınasyn urlaǵan kúdikti materıaldyq shyǵyndy ótedi
ALMATY. QazAqparat – Olımpıada chempıony Dmıtrıı Balandınniń aınasyn urlaý deregi boıynsha sot jalǵasyp jatyr, dep habarlaıdy QazAqparat tilshisi sot zalynan.
Kúdikti Aıdos Valıev QR QK 188-baby boıynsha jaýap berip jatyr.
Advokat Álııa Sháripbaevanyń aıtýynsha, sottalýshy Olımpıada chempıony Dmıtrıı Balandınge keltirilgen materıaldyq shyǵyndy tolyq ótegen.
«Dmıtrıı Balandınge kelgen shyǵyn tolyǵymen óteldi. Buǵan qatysty qazir másele joq. Balandınniń 300 myń teńge kóleminde azamattyq aryzy bolǵan. Іs materıaldarynda shyǵynnyń qaıtarylǵany týraly málimet bar. Jábirlenýshi Balandın óz pikirin bildirýden bas tartyp, sheshimdi sottyń qaraýyna qaldyrdy», - dedi advokat Álııa Sháripbaeva.
Sondaı-aq, atalǵan is boıynsha ekinshi jábirlenýshiniń isi qaralyp jatyr.
Aıyptalýshy Dmıtrıı Balandınniń kóliginen bólek Raýanbek Qýanovtyń Land Rover Discovery kóliginiń aınasyn urlap ketken. Sot otyrysynda ekinshi jábirlenýshi Raýanbek Qýanovqa da 300 myń teńgeden asa materıaldyq shyǵyn óteldi.
Alaıda, jábirlenýshi sottalýshyny keshiretinin aıtpady. Ol muny sottyń qaraýyna qaldyrdy.
Eske sala keteıik, oqıǵa 1 sáýirde bolǵan. Qurmanǵazy men Baıseıitova kósheleriniń qıylysynda Olımpıada chempıony Dmıtrıı Balandınniń Toyota Land Cruiser kóliginiń aınasyn bireýler urlap ketken bolatyn. Osydan bir jyl buryn sol jerde Denıs Tenniń kóliginiń aınasyn urlaǵan urylar sportshyny pyshaqtap, jer jastandyrǵan edi.
