Dmıtrıı Balandın kóliginiń aınasyn urlaǵan kúdikti 3 jylǵa sottalýy múmkin
ALMATY. QazAqparat – Almatyda prokýror Olımpıada chempıony Dmıtrıı Balandınniń aınasyn urlaǵan kúdiktini 3 jylǵa bas bostandyǵynan aıyrýdy surady, dep habarlaıdy QazAqparat tilshisi sot zalynan.
Іs №2 Almaly aýdandyq sotynda qaralyp jatyr. Kúdikti Aıdos Ýálıev QR QK 188-baby boıynsha jaýap berip jatyr.
Jábirlenýshiler belgili Olımpıada chempıony Dmıtrıı Balandın men Almaty turǵyny Qýanov Raýanbek. Sottalýshy ekeýiniń kóliginen aınalaryn urlap ketken.
Eske salsaq, aldyńǵy sot otyrysynda sottalýshy jábirlenýshilerge keltirilgen materıaldyq shyǵyndy tolyǵymen ótegen bolatyn.
«Barlyq dálelder zańdy túrde jınaldy. Kúdikti Aıdos Ýálıev QR QK-niń 188-baby boıynsha aıypty dep tanyp, 3 jylǵa bas bostandyǵynan aıyrýdy suraımyn. Ol jazasyn qaýiptiligi orta dárejedegi orynda ótesin», - dedi memlekettik aıyptaýshy - prokýror Arman Orazbaqov.
Al Aıdos Ýálıev sońǵy sózinde jylap jiberdi.
«Men aıybymdy moıyndaımyn. Qylmys jasaǵanyma ókinemin. Men túrmede otyryp namaz oqı bastadym, táýbama keldim. Maǵan sońǵy ret múmkindik berýlerińizdi suraımyn. Men ózgeremin. Otbasyn quryp, bala súıgim keledi. Meni qamamańyzdar»,- dedi sottalýshy.
Eske sala keteıik, oqıǵa 1 sáýirde bolǵan. Qurmanǵazy men Baıseıitova kósheleriniń qıylysynda Olımpıada chempıony Dmıtrıı Balandınniń Toyota Land Cruiser kóliginiń aınasyn bireýler urlap ketken bolatyn.
Osydan bir jyl buryn sol jerde kóliktiń aınasyn urlaǵandar mánerlep syrǵanaýshy Denıs Tendi pyshaqtap ketken bolatyn.
