Dmıtrıı Balandın kóliginiń aınasyn urlaǵan adam qolǵa tústi
ALMATY. QazAqparat - Almatyda Olımpıada chempıony Dmıtrıı Balandınniń kóliginiń aınasyn urlaǵan adam ustaldy, dep habarlaıdy QazAqparat tilshisi.
Qalalyq Polıtsııa basqarmasynyń habarlaýynsha, krımınaldy polıtsııasy basqarmasy men Almaly aýdandyq polıtsııa basqarmasynyń qyzmetkerleri 33 jastaǵy er adamdy ustaǵan.
Kúdikti buǵan deıin 3 ret osyndaı qylmys jasaǵany úshin sottalǵany belgili boldy.
«Ol bir jerde eki ret qylmys jasaǵanyn moıyndady. Qylmystyq is boıynsha aıǵaq zattar kúdiktiniń turatyn mekenjaıynan tabylyp, is materıaldaryna tirkeldi», - dedi polıtsııa departamentinen.
Aıta ketý kerek, bul derekter boıynsha is QR QK-niń 188-babymen sotqa deıingi tergeý tizilimine tirkeldi.
Qylmyskerdiń urlyq jasaǵan sáti kóshedegi beınebaqylaý kamerasyna túsip qalǵan.
Polıtsııa múlik urlyǵyna qatysty qylmysty azaıtý maqsatynda adam kóp shoǵyrlanǵan jerlerde jedel-proflıaktıkalyq is-sharalardy belsendi júrgizip keledi. Sol sharalardyń nátıjesinde 4 myń 651 adam ustalyp, 118 qylmystyq toptyń áreketine tosqaýyl qoıyldy.
Avtokólik bólshekterin urlaǵan 403 adamnyń ishinde 37-si aına urlaýmen aınalysyp kelgen. Olardyń 7-i buryn sottalǵan.
Urlanǵan zatty saýdalamaq bolǵan 16 adam sottaldy. Osyndaı saýda núktelerinen 51 búıir aınasy, 7 avtomagnıtola, 14 tumanǵa qarsy far tabylǵan.
