Dmıtrıı Balandın, Eldos Smetov: Úzdik sportshy atanýǵa kim laıyq

«Qazaqstan sportshylary ár aı saıyn álemdik jarystarda top jaryp, elimizdiń kók Týyn bıikte jelbiretýde. Álem kýbogi kezeńderi men álem birinshilikteri, sondaı-aq Gran-prı týrnırleri men halyqaralyq jarystardan el sportshylarynyń qorjyny bos qaıtqan emes. Al Olımpıada qarsańyndaǵy maýsymda árbir júldeniń mańyzy zor ekeni aıtpasa da túsinikti. Osy oraıda, Olympic.kz jankúıerlerdi ár aıdyń úzdik sportshysyn anyqtaýǵa shaqyrady. Búgin «Shilde aıynyń úzdik sportshysyna» daýys berý bastalady», - dep jazylǵan komıtettiń resmı saıtynda.

Qazaqstandyqtar júzýden Olımpıada chempıony Dmıtrıı Balandınge, dzıýdoshylar Eldos Smetov pen Otgontsetseg Galbadrahqa, karateshi Andreı Aktaýovqa jáne taekvondoshy Rýslan Japarovqa daýys bere alady.

Aıta keteıik, «Maýsym aıynyń úzdik sportshysy» ataǵyn karateshi Darhan Asadilov jeńip alǵan bolatyn.

Dmıtrıı Balandın, júzý

Rıo Olımpıadasynyń chempıony Dmıtrıı Balandın Kvandjdýa ótken álem chempıonatyn jetinshi orynmen aıaqtady. Ol 100 jáne 200 metrge brass ádisimen júzýden fınalǵa joldama alyp, eki básekede de jetinshi satyǵa taban tiredi. 100 metrge brass ádisimen júzýde Balandın 59.03 sekýndty tirkep, el rekordyn jańartty, sondaı-aq, Tokıo Olımpıadasyna joldama utyp aldy. Al óziniń oń jambasyna saı keletin 200 metrge brass ádisimen júzýden fınalda synǵa tústi. Dmıtrıı Balandın alǵashqy Olımpıada joldamasyn kóktemde ıelengen bolatyn.

Eldos Smetov, dzıýdo

Dzıýdodan Qazaqstan komandasynyń kóshbasshysy jaraqatynan aıyǵyp, iri jarystarda júlde sala bastady. Bıylǵy maýsymda birneshe ret jeńis tuǵyrynan kóringen ol Býdapeshtte ótken Gran-prı týrnırinde de qarsylas shydatqan joq. 60 keli salmaqta synǵa túsken Smetov 2014 jylǵy álem chempıony, mońǵolııalyq Ganbat Boldbaatardy «ıppon» upaıymen jeńip, altyn medal ıelendi. Sondaı-aq, IJF reıtınginde úzdik bestikke endi.

Andreı Aktaýov, karate

Shilde aıynda karateden reıtıngilik Azııa chempıonaty ótti. Qurlyq dodasynan Qazaqstan sportshylary úsh medalmen oraldy. Onyń ishinde altyn júldeni 55 kelide synǵa túsken Andreı Aktaýov ıelengen bolatyn. 2014 jylǵy Azııa oıyndarynyń jeńimpazy Tashkent tórinde Kambodja, Iran, Malaızııa jáne Saýd Arabııasy sportshylarynan basym tústi. Fınalda Aktaýov óziniń ejelgi qarsylasy, saýdııalyq Álsharbı Abdýllany utyp, el Ánuranyn shyrqatty.

Rýslan Japarov, taekvondo

Taekvondodan komanda úzdikteriniń biri Rýslan Japarov úshin bıylǵy maýsym jaqsy ótýde. Ol túrli halyqaralyq týrnırlerde reıtıngilik upaı jınap, júldegerler qatarynan kórinip júr. Shilde aıynda Ońtústik Koreıada ótken jarysta Japarov 87 keliden joǵary salmaqta synǵa túsip, kúmis júldeger atandy. Búginde ol álemdik reıtıngte 15-shi, olımpıadalyq reıtıngte 19-shy orynda tur.

Otgontsetseg Galbadrah, dzıýdo

Dzıýdodan Qazaqstan áıelder komandasynyń úzdigi araǵa biraz ýaqyt salyp tatamıge qaıta oraldy. Ol Zagrebte ótken álemdik Gran-prı týrnırinde top jardy. 48 kelide beldesken Otgontsetseg fınalda frantsııalyq Melanı Klementti jeńip, týrnır jeńimpazy atandy. Osydan soń, qazaqstandyq sportshy reıtıngte joǵarylap, altynshy satyǵa turaqtady. Siz óz daýsyńyzdy Olympic.kz saıtynyń negizgi betine qaldyra alasyz. Daýys berý 7 tamyz kúni Nur-Sultan ýaqytymen 13.00-de aıaqtalady.