Dmıtrıı Balandın 200 metrge brass ádisimen júzýde jartylaı fınalǵa shyqty

TOKIO. QazAqparat - Tokıo Olımpıadasynda synǵa túsip jatqan Dmıtrıı Balandın 200 metr qashyqtyqta brass ádisimen júzýde jartylaı fınalǵa shyqty, dep habarlaıdy QazAqparat.

Qazaqstandyq sportshy 200 metrlik qashyqtyqta brass ádisimen júzýde sátti oıyn kórsetti. Ol atalǵan mejeni 2:08.99 ýaqytta oryndady.

Osylaısha jarysqa túsken segizdiktiń arasynda tórtinshi orynǵa qol jetkizdi. Nátıjesinde erteń, 28 shildede ótetin jartylaı fınalǵa joldama aldy.

Atalǵan qashyqtyqtaǵy fınal 29 shildege belgilengen.

Aıta keteıik, 2016 jyly Rıo Olımpıadasynda ol atalǵan saıys túrinde chempıon atanǵan bolatyn.

Bul - elimizdiń sýǵa júzý sportyndaǵy ázirge eń joǵary kórsetkish.

Eske sala keteıik, Dmıtrıı Balandın Tokıo Olımpıadasynda budan buryn 100 metrge brass ádisimen júzýde jartylaı fınaldan tys qaldy.