DJ Imanbek Pavlodardaǵy jol qaýipsizdigi aktsııasynda jastarǵa úndeý jasady
PAVLODAR. KAZINFORM – Pavlodar oblysynda «Qaýipsiz jol» profılaktıkalyq reıdi barysynda prokýratýra men polıtsııa departamentiniń qyzmetkerleri joldaǵy apattardyń aldyn alý jáne júrgizýshilerdiń mádenıetin arttyrý maqsatynda birlesken is-shara ótkizdi.
Qazaqstan Bas prokýratýrasy baspasóz qyzmetiniń málimetinshe, atalǵan is-sharaǵa tanymal qazaqstandyq mýzykalyq prodıýser, «Gremmı» syılyǵynyń ıegeri DJ Imanbek qatysty. Ol quqyq qorǵaý organdarynyń ókilderimen birge temir tulpardy tizgindegenderdi jol qozǵalysy erejelerin qatań saqtaýǵa shaqyrdy.
Reıd kezinde júrgizýshilerge jyldamdyqty baqylaý, qaýipsizdik beldigin taǵý, mas kúıinde kólik basqarmaý jáne jolda abaı bolý qajettigi eskertildi.
Uıymdastyrýshylar mundaı aktsııalarǵa tanymal tulǵalardy tartý keń aýdıtorııaǵa, ásirese jastarǵa jol qaýipsizdigi týraly aqparatty tıimdi jetkizýge múmkindik beretinin atap ótti.
Pavlodar oblysynyń prokýratýrasy jol qaýipsizdigin qamtamasyz etý – barshaǵa ortaq mindet ekenin eske salyp, barlyq jol qatysýshysyn jaýapkershilikpen jáne tártippen júrýge shaqyrady.
Aıta keteıik, buǵan deıin Almaty kóshelerinde jarysqan taǵy bir top júrgizýshi ustalǵanyn jazǵanbyz.
