Dızel táýliktik lımıtpen satylýy múmkin

NUR-SULTAN. QazAqparat – Dızel otynyn satyp alýǵa táýliktik lımıt qoıylýy múmkin. Energetıka mınıstrligi osyndaı usynys engizgen buıryq jobasyn ashyq talqyǵa shyǵardy, dep habarlaıdy QazAqparat tilshisi.

«Іshki naryqtaǵy teńgerimdi saqtaý, sondaı-aq shekara mańyndaǵy elderge dızel otyny aǵyndarynyń táýekelderin barynsha azaıtý maqsatynda táýliktik lımıt belgileý usynylady. Lımıtten joǵary mólsherdegi dızel otyny úshin saralanǵan baǵa belgilenedi.

Argus derekterine sáıkes, EAEO-ǵa múshe elderdegi Kaspıı naryǵy 01.08.2022 jylǵy jaǵdaı boıynsha dızel otynynyń baǵasy mynadaı:

Armenııa - lıtrine 758 teńge;

Reseı - lıtrine 446 teńge;

Qyrǵyzstan - lıtrine 412 teńge;

Belarýs - lıtrine 446 teńge.

Osynyń negizinde dızel otynyna lımıtten joǵary satý jaǵdaılary úshin EAEO-ǵa múshe elder arasyndaǵy ortasha baǵa deńgeıinde lıtrine - 450 teńge etip belgileý usynylady», - dep kórsetilgen ózgeris engizilgeli otyrǵan qujatta.

Osyǵan sáıkes, endi Aqmola, Aqtóbe, Shyǵys Qazaqstan, Batys Qazaqstan, Qostanaı, Soltústik Qazaqstan jáne Abaı oblystarynyń azamattary jeńil kólikterge 1 táýlikte 100 lıtrge deıin dızel satyp alsa, onda onyń baǵasy 260 teńge bolady. Sonymen qatar, turǵyndar dızel satyp alý barysynda jeke kýáligin kórsetýi qajet. Al, atalǵan óńirlerde júk kólikteri úshin táýliktik lımıt - 300 lıtr. Odan kóp satyp alatyn bolsa, onda lıtrine barlyq kólik 450 teńge tóleıdi.

Nur-Sultan, Almaty, Shymkent qalalarynda, Almaty, Atyraý, Jambyl, Qaraǵandy, Qyzylorda, Pavlodar, Túrkistan, Mańǵystaý, Jetisý jáne Ulytaý oblystarynda 1 táýlikte 100 lıtrge deıin dızel satyp alatyn adam ár lıtrine 230 teńge tóleıdi. Júk kólikterine osy qun qoıylady. Biraq olar 230 teńgeden 300 lıtrge deıingi kólemdegi dızeldi ala alady. Belgilengen lımıtten kóp mólsherdegi dızel otyny úshin ár lıtrine 450 teńge tóleý qajet.

Eske sala keteıik, keshe Energetıka mınıstri Bolat Aqsholaqov kúzde aýyl sharýashylyǵy taýaryn óndirýshilerge arnalǵan dızel otynynyń baǵasy qymbattaıtynyn málimdegen edi.