Dızel otynynyń aktsızdik alymy tonnasyna 940 teńge deńgeıinde qaldy
ASTANA. QazAqparat - Dızel otynynyń aktsızdik alymy tonnasyna 940 teńge deńgeıinde qaldy. Bul týraly búgin Ortalyq kommýnıkatsııalar qyzmetindegi brıfıngte QR Energetıka vıtse-mınıstri Áset Maǵaýov málim etti, dep habarlaıdy QazAqparat.
«2017 jyldyń 20 naýryzynan bastap Shymkent zaýytyna kúrdeli jóndeý jumystary júrgizilýde. Onda zaýytty jańǵyrtýdyń birinshi kezeńi boıynsha negizgi jumystar aıaqtalady. Kólem turǵysynan alyp qaraǵanda, munaı ónimderi naryǵynda tapshylyq týyndaý táýekelin kórip otyrǵanymyz joq. Ótken jylmen salystyrǵanda bizdiń dızel qorymyz 2016 jylǵy qordan 100 myń tonnaǵa artyq», - dedi Áset Maǵaýov.
Onyń aıtýynsha, Úkimet 1 sáýirden bastap aktsızdiń 9300 teńgege qymbattaýyna jol bergen joq. Mundaı shara osy jyldyń sáýiri men mamyr aılarynda dızel otynyn jóneltý barysynda baǵanyń kóterilip ketpeýi úshin jasalyp otyr. Aktsız tonnasyna 940 teńge deıinde saqtalatyn bolady.
Sonymen qatar vıtse-mınıstr munaı ónimderi naryǵyndaǵy ahýaldyń turaqty ekendigin basa aıtty. Zaýyttardan benzın men dızel otynyn jiberý turaqty negizde júzege asyrylýda. Reseı tarapynan AI-92 markaly benzındi jetkizý barysynda da táýekelder baıqalmaıdy. Munaı óńdeý zaýyttaryn jańǵyrtý jumystary da bekitilgen kestege sáıkes júrgizilýde.
