Dızel otynyn shetelge shyǵarýǵa tolyqtaı tyıym salynýy múmkin
ASTANA. QazAqparat - Májilis depýtattary Qazaqstannan shetelge dızel otynyn shyǵarýǵa tolyqtaı tyıym salýdy usyndy, dep habarlaıdy QazAqparat tilshisi.
«Taýardyń túpkilikti baǵasy men ekonomıkanyń naqty sektorynyń damýyna dızel otyny qunynyń teris áserin eskere otyryp, otynnyń osy túrine baǵanyń tómendeýine tutynýshylardyń negizgi bóligi muqtaj bolyp otyr dep sanaımyz. Osy oraıda, Úkimetke aktsızder mólsherin tómendetýdi, sondaı-aq shetelge dızel otynynyń shyǵarylýyna tolyqtaı tyıym salýdy usynamyz», - dedi depýtat Aıqyn Qońyrov Májilistiń jalpy otyrysynda.
2018 jyly Qazaqstan úsh negizgi munaı óńdeý zaýyttarynda jańǵyrtý jumystary aıaqtalyp, endi K4,K5 sanatyndaǵy munaı ónimderimen qamtamasyz etýde. Osy oraıda Reseıdiń ónimderine degen suranys aıtarlyqtaı tómendedi.
Depýtattyń aıtýynsha, elimizde óndiris kóleminiń artýyna baılanysty jáne ishki naryqty qorǵaý sharalaryna oraı, 2018 jyly AI 95/96 men AI 92 benzın baǵasy 5 paıyzǵa tómendedi. Al jazdyq dızel otyny quny 21,9 paıyzǵa, qysqy dızel otyny baǵasy 26,2 paıyzǵa kóterildi.
«Júk jáne jolaýshylar tasymalynyń basym bóligi dızel otynymen júretin kólikterge tıesili. Atalǵan jaǵdaı qyzmet kórsetý qunynyń ósýine alyp keldi», - dedi depýtat.
