Dızel otyny halyqqa qandaı sharttarmen satylyp jatyr – mınıstr jaýaby
Bolat Aqsholaqov atap ótkendeı, búgingi tańda mınıstrliktiń qyzmeti munaı-gaz jáne energetıka salalary sııaqty strategııalyq baǵyttarda shoǵyrlanǵan. Janar-jaǵarmaı materıaldary naryǵyn reformalaýǵa qatysty vedomstvo birqatar sharalar qabyldady. Mysaly, munaı ónimderin óndirý jáne bólý salasyndaǵy ashyqtyqty qamtamasyz etý úshin mınıstrlik joǵary marjınaldyǵy bar, alaıda menshik quqyǵynda munaı bazasy joq jáne shalǵaı óńirler men áleýmettik mańyzy bar kásiporyndarǵa janar-jaǵarmaı bólýge qatyspaıtyn ónimsiz deldaldardy naryqtan shyǵarýǵa nıetti. Sondaı-aq Energetıka mınıstrligi munaı ónimderin avtokólikpen shyǵarýǵa tyıym salýdy bıylǵy jyl sońyna deıin uzartý týraly buıryq qabyldady. Al dızel otynynyń tapshylyǵyn boldyrmaý úshin baǵalardyń saralanýy ázirlendi. Oǵan sáıkes azamattar úshin dızel otyny júrgizýshi kýáligin kórsetken kezde 100 lıtrge deıin jáne júk kóligine tehpasport usynylǵan kezde 300 lıtrge deıingi arnaıy 230/260 teńge baǵamen beriledi. Belgilengen kólemnen joǵary jáne tranzıttik kólik úshin baǵa 1 lıtr úshin 450 teńge bolady.
Bolat Aqsholaqov sapar barysynda taǵy bir ózekti máseleni qozǵady. Energetıka mınıstri qaraǵandylyqtardy kúzgi dala jumystaryn júrgizýge agrotaýar óndirýshilerine dızel otynyn jetkizý jumystary týraly habarlady.
«Búgingi kúni kúzgi dala jumystaryn ýaqytyly jáne turaqty júrgizý úshin elimizdiń aýyl sharýashylyǵy taýar óndirýshileriniń atyna munaı óńdeý zaýyttarynda tonnasyna 222 myń teńge (184 teńge/lıtr) baǵasy boıynsha 423 myń tonnadan astam dızel otyny bólindi, bul bólshek saýda baǵasynan óńirge baılanysty ortasha eseppen 15-25% tómen. Onyń ishinde, Qaraǵandy oblysyna 20,7 myń tonna dızel otyny qarastyrylǵan. Qazirgi ýaqytta aýyl sharýashylyǵy taýaryn óndirýshilerdiń atyna dızel otynyn jóneltý basym túrde júzege asyrylýda», - dep atap ótti Bolat Aqsholaqov.
Sonymen qatar Energetıka mınıstrligi aýyl sharýashylyǵy taýarlaryn óndirýshiler úshin dızel otynyn jetkizý naryǵyn reformalaýdy qolǵa almaq. Ol úshin baılanys derekterin, egistik jerlerdiń jalpy alańyn, janar-jaǵarmaı qajettiligin kórsete otyryp, aýmaqtyq bóliniste aýyl sharýashylyǵy taýaryn óndirýshilerdiń derekter bazasyn qurý, otyn bólý úshin elektrondyq-aqparattyq júıeni engizý josparlanyp otyr. Bul aýyl sharýashylyǵy óndirýshilerine munaı bazalarynda nemese resýrs ustaýshylardan munaı ónimderin óz betinshe satyp alýǵa múmkindik beredi.
Sondaı-aq 20 shildede bırjalyq saýda-sattyq kezinde baǵanyń kúrt kóterilýine jol bermeýge múmkindik beretin bırjalyq saýdanyń Úlgilik erejelerine ózgerister engizildi.
