Dızel otyny 115 teńgege joǵarylaıdy dep kútilýde - Energetıka mınıstrligi
"Bizdiń dızel otynynyń baǵasy Reseıdegiden eki ese arzan. Bizdiń baǵalar, qatelespesem, 1997 jyldan beri ózgermeı keledi. Bizdińshe, bul jaǵdaıdy qoldan ustap turý durys emes. Bul otandyq munaı kompanııalaryna da keri áserin berýde. Olar jyldyq qarjylyq axýalynda teris kirispen aıaqtaýda. Munaı salasynyń turalap qalý qaýpi bar. Baǵanyń kóterilýi qajet, sebebi tamyzda dızel otyny bolmaı qalýy múmkin. Keıin qysqy mezgilde baǵa qaıta tómendeıdi", - deıdi ol.
Onyń sózine qaraǵanda, aýyl sharýashylyǵynda egin jınaý naýqanyna jyldaǵydaı tómen baǵamen eginshilerge 400 myń tonnaǵa jýyq dızel otyny bólingen. Olarǵa baǵa ózgermeıdi jáne jeńildikpen eseptegende lıtrine 79 teńge shamasynda bolmaq.
"Qazir Qazaqstanda shamamen 200 myń tonna dızel otynynyń qory bar. Osy aıda 400 myń tonnasyn qosymsha óndiretin bolamyz. 25 shildedegi jaǵdaı boıynsha, biz 330 myń tonna shyǵaryp úlgerdik. Onyń 97 paıyzyn tutynýshylarǵa jetkizildi. Demek, búginde dızel otyny úzdiksiz naryqqa shyǵarylýda", - dedi vıtse-mınıstr.
Bunyń aldynda «QazAqparat» tilshisine bergen suhbatynda munaı-gaz salasy boıynsha táýelsiz sarapshy Oljas Baıdildaev memleket dızel otynynyń baǵasyn uzaq ýaqyt tejep, ustap turýǵa kúsh saldy, biraq, báribir naryq zańdylyǵyna qarsy turý múmkin emes ekendigin aıtqan bolatyn.
«Sońǵy aqparattarǵa súıensek, elimizdiń keıbir óńirlerinde dızel otynynyń tapshylyǵy baıqalady. Sebebi túsinikti - ishki naryqta dızel otynynyń dollarlyq balama baǵasy tym tómen. Sáıkesinshe, dızel otynyn jetkizýshilerge ishki naryqta satý tıimsiz», - dedi O. Baıdildaev.
