Dızel otynynyń qozǵalysy tsıfrlandy: Sharýalardyń naqty tutynýy 21 paıyzǵa azaıdy
ASTANA. KAZINFORM — Kúzgi dala jumystaryna 401 myń tonna dızel otyny bólindi. Bul týraly búgin Úkimet otyrysynda Energetıka vıtse-mınıstri Qaıyrhan Tutqyshbaev aıtty.
— Kúzgi dala jumystaryna daıyndyq aıasynda aýyl sharýashylyǵy taýaryn óndirýshilerdi dızel otynymen qamtamasyz etý maqsatynda 2026 jylǵy shildede Energetıka jáne Aýyl sharýashylyǵy mınıstrlikteri birlesip, bıylǵy 1 shilde men 30 qarasha aralyǵyna arnalǵan «2026 jylǵy kúzgi dala jumystaryna 401,1 myń tonna dızel otynyn jetkizý grafıgin» bekitti. Qazirgi ýaqytta aýyl sharýashylyǵy taýaryn óndirýshilerge dızel otynyn jetkizý Memleket usynǵan jeńildetilgen baǵa boıynsha júzege asyrylyp jatyr. Jyl saıyn 800 myń tonna dızel otyny bólingen kezde sońǵy 3 jyldaǵy naqty ıgerý kórsetkishi 80 — 86 paıyzdy quraıdy, — dedi ol.
Onyń málimetinshe, 2026 jyly aýyl sharýashylyǵy taýaryn óndirýshiler úshin 844,7 myń tonna dızel otyny bólindi. Naqty ıgerý kólemi — 606 myń tonnany nemese 72 paıyz. Bul rette 2026 jylǵy 3 qyrkúıekte aýyl sharýashylyǵy taýaryn óndirýshilerdiń qajettilikteri úshin astyq pen maıly daqyldardy keptirýge qosymsha dızel otynyn bólý máselesine qatysty ótken keńestiń qorytyndysy boıynsha mınıstrlik 41,3 myń tonna dızel otynyn bóldi.
— 2024 jyly munaı ónimderiniń qozǵalysyn tsıfrlandyrý boıynsha qabyldanǵan sharalardyń nátıjesinde 2023 jylmen salystyrǵanda bólingen kólemder aıasynda aýyl sharýashylyǵy taýaryn óndirýshilerdiń naqty tutynýy 729 myń tonnadan 602 myń tonnaǵa deıin, ıaǵnı 127 myń tonnaǵa nemese 21 paıyzǵa tómendedi. Budan bólek, qazirgi ýaqytta mnıstrlikpen Shymkent munaı óńdeý zaýytynda óndiriletin aýyl sharýashylyǵy qajettilikterine arnalǵan dızel otynyn molekýlalyq tańbalaý pılottyq jobasyn iske asyrý boıynsha jumystar júrgizilip jatyr. Pılottyq jobany iske asyrý merzimi — 2026 jylǵy 1 qyrkúıekten 31 jeltoqsanǵa deıin, operator fýnktsııalaryn «QazMunaıGaz» aktsıonerlik qoǵamy jáne «Tsıfrlyq ekonomıkany damytý ortalyǵy» jaýapkershiligi shekteýli seriktestigi atqarady, — dedi vıtse-mınıstr.
Qaıyrhan Tutqyshbaevtyń málimetinshe, «shilde–qarasha» kezeńinde 2026 jylǵy kúzgi dala jumystarynyń búkil kezeńine kózdelgen 401,1 myń tonnanyń 268 myń tonnasy nemese 67 paıyzy tıep-jóneltildi.
— Munaı óńdeý zaýyttarynan tıep-jóneltý aýyl sharýashylyǵy taýaryn óndirýshiler ótinimderine, tólemniń júrgizilýine jáne vagondardyń berilýine baılanysty, — dedi ol.
Aıta keteıik, otyrysta kúzgi jıyn-terim barysy qaralyp jatyr.
