Dızel «kóleńkeli eksport» arqyly shyǵarylyp jatyr - Bolat Aqsholaqov

ASTANA. QazAqparat – Janarmaıdyń qazirgi baǵasy munaı-gaz salasyna ınvestıtsııa tartýǵa múmkindik bermeı otyr. Bul týraly QR Energetıka mınıstriniń mindetin atqarýshy Bolat Aqsholaqov aıtty, dep habarlaıdy QazAqparat tilshisi.

«Janarmaı tapshylyǵyn boldyrmaý maqsatynda túrli sharalar qabyldandy. Osy oraıda janarmaıdy temirjol jáne avtokólikpen shyǵarýǵa tyıym salyndy. Resýrs ıelerine janarmaıdy tikeleı janarmaı quıý stantsııalaryna satýǵa mindetteıtin zańnamalyq normalar qabyldandy. Munaıdy jetkizý jáne munaı ónimderin satý kezindegi deldaldarǵa tosqaýyl qoıyldy. Budan basqa, byltyr tamyz aıynda tapshylyqty azaıtý úshin saralanǵan baǵany jáne lımıt engizdik. Biraq barlyq shekteýge qaramastan, «kóleńkeli eksport» arqyly otyndy shyǵarý múmkindikteri tabyldy. Osyǵan baılanysty tapshylyqty boldyrmaý úshin shuǵyl túrde qymbat ımporttyq otyndy satyp alýǵa májbúr bolyp otyrdyq», - dedi B. Aqsholaqov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, elimizde qazirgi tómen baǵalar saqtalsa, Qazaqstanda qansha janarmaı óndirilse de barlyq suranysty qamtamasyz etý múmkin bolmaıdy.

«Ekinshiden, baǵalar arasyndaǵy aıtarlyqtaı aıyrmashylyqqa baılanysty kórshi elderge «aǵyn» jalǵasa beredi, onyń kólemi arta túsedi. Eshqandaı shekteýler nátıje bermeıtini anyq. Úshinshiden, janarmaı baǵasyndaǵy dısproportsııa «kóleńkeli» naryqty nyǵaıtyp, ulttyq ekonomıkaǵa, múddege keri áserin tıgizedi. Tórtinshiden, janarmaı boıynsha tómen baǵany saqtaý munaı-gaz salasyna ınvestıtsııa tartýǵa, ony damytýǵa, geologııalyq barlaý jumystaryn júrgizip, resýrstyq bazany tolyqtyrýǵa múmkindik bermeı otyr», - dedi mınıstrdiń mindetin atqarýshy.

Onyń sózine qaraǵanda, ishki naryqtaǵy janarmaı jaǵdaıyn turaqtandyrý úshin Qazaqstannyń kórshi eldermen salystyrǵandaǵy baǵa boıynsha aıyrmashylyqty azaıtý qajet.

Budan buryn habarlanǵandaı, Qazaqstanda benzın men dızel otynynyń baǵasy ósedi.

QR Energetıka mınıstriniń mindetin atqarýshy Bolat Aqsholaqov elimizde janarmaı baǵasynyń ósýine qandaı sebepter áser etip otyrǵanyn aıtty.