Dızeldiń ornyna benzın quıyp bergen JQS Astana turǵynyna 1 mln tóleıdi
ASTANA. QazAqparat - Astana turǵyny óz kóligine dızeldi otynnyń ornyna benzın quıyp bergen janarmaı quıý stansasyna qarsy sotta jeńip shyqty, dep habarlaıdy QazAqparat elorda sotynyń baspasóz qyzmetine silteme jasap.
Sotta anyqtalǵandaı, 2016 jyldyń qazan aıynda azamat G. «Mitsubishi Delika» kóligimen Astanadaǵy janar-jaǵarmaı quıý beketteriniń birine barǵan. 2-baǵannyń janyna toqtap, kóliginen shyǵa bere operatorǵa dızeldi otyn quıatyndyǵyn eskertken. Keıin kassaǵa baryp, ol jerde kóligine dızel kerektigin taǵy bir ret aıtqan.
«Avtokólikti otynmen toltyrý kezinde dızeldiń ornyna benzın quıylǵan. Saldarynan qozǵaltqysh isten shyqqan. Janarmaı quıý beketinen 500 metr uzaı bere kólik toqtap qalyp, otalmaı qalaǵan. Astana qalasy Almaty aýdandyq soty avtokólik ıesine 1 mln teńge kólemindegi shyǵyndy ótep berý týraly aryz-shaǵymdy qanaǵattandyrdy», - delingen sot habarlamasynda.
Sot úkimi zańdy kúshine engen joq.
