Dızeldi satýǵa shekteý engizgen jaǵarmaı quıý stantsııalaryna shara qabyldanady

ASTANA. QazAqparat – Janar-jaǵarmaıdy satýǵa shekteý engizgen jaǵarmaı quıý stantsııalaryna shara qabyldanady. Bul týraly Básekelestikti qorǵaý jáne damytý agenttiginen málim etti, dep habarlaıdy QazAqparat.

«El óńirlerinde jaǵarmaı quıý stantsııalarynda janar-jaǵarmaıdy (JJM) satýdy shekteý faktileriniń jıileýine baılanysty Básekelestikti qorǵaý jáne damytý agenttigi bul áreketter monopolııaǵa qarsy zańnamany buzý ekendigin eske salady.

Kásipkerlik kodeks naryqqa qatysýshylardyń kelisilgen is-áreketterine jáne basym kompanııalardyń taýardy ótkizýden negizsiz bas tartý jónindegi is-áreketterine tyıym salady.

Memlekettik organdar kún saıyn janar-jaǵarmaı quıý stantsııalarynda jáne saqtaý bazalarynda munaı ónimderiniń satylýyna monıtorıng júrgizedi.

Baǵanyń josparly ósýine qaramastan, kásipkerlik sýbektileri JJM bolǵan kezde olardy belgilengen baǵalar boıynsha ýaqytyly ótkizýge mindetti.

Janar-jaǵarmaıdyń qaldyq kólemi ulǵaıǵan jaǵdaıda jáne janar-jaǵarmaıdy satýdy shektegen josyqsyz kásipkerlerge shara qabyldanatyn bolady», - delingen agenttik málimdemesinde.

Atap ótilgendeı, monopolııaǵa qarsy zańnamany buzǵany úshin Ákimshilik quqyq buzýshylyq týraly kodeks aıasynda kompanııa tabysynyń 5% deıin aıyppul salýdy kózdelgen.

«Qazirgi ýaqytta Básekelestikti qorǵaý jáne damytý agenttiginiń aýmaqtyq organdary zańnamany buzý belgileriniń bolýy turǵysynan JJM ótkizýdi shekteý faktilerin tekserip jatyr.

Básekelestikti qorǵaý jáne damytý agenttigi kásipkerlerdi básekelestik zańnamanyń talaptaryn múltiksiz saqtaýǵa jáne JJM-dy tolyq kólemde satyp otyrýǵa shaqyrady», - dedi vedomstvodan.

Jaǵarmaı quıý stantsııalary otyndy satýdan bas tartqan jaǵdaıda – Básekelestikti qorǵaý jáne damytý agenttiginiń aýmaqtyq bólimshelerine, al belgilengen baǵalar asyrylǵan jaǵdaıda – Ulttyq ekonomıka mınıstrligi Tabıǵı monopolııalardy retteý komıtetiniń aýmaqtyq bólimshelerine habarlaýǵa bolady.