Dızaınerlerge: Jumysyńdy usyn da 2 mln teńge utyp al

ASTANA. QazAqparat - «QazAqparat» HAA Elbasynyń «Rýhanı jańǵyrý» baǵdarlamasyn qoldaý maqsatynda uıymdastyrylǵan dızaınerlik sheshimder baıqaýyna ótinimderdi qabyldaýdy jalǵastyrýda.

Konkýrsqa usynylatyn jobalar Elbasynyń «Rýhanı jańǵyrý» baǵdarlamasynda aıtylǵan taqyryptyq baǵyttarmen úılesýi tıis, atap aıtqanda, qasıetti nysandar, kıeli oryndar, tarıhı eskertkishter; qazaq mádenıeti men dástúrine úılesken elementter; týǵan jerge degen mahabbat; bilim kýlti; básekelik qabilet; pragmatızm; ulttyq biregeılikti saqtaý; Qazaqstannyń revolıýtsııalyq emes, evolıýtsııalyq damýy; sananyń ashyqtyǵy.

Jeke tulǵa nemese ujym baıqaýǵa ár baǵyt boıynsha bir ǵana jumysyn usyna alady.

Baıqaý 1 qarasha - 15 jeltoqsan aralyǵynda ótedi. Qatysýshylar úshin jas erekshelikteri boıynsha shekteý joq.

Eń úzdik týyndylardy arnaıy qurylǵan qazylar alqasy anyqtaıtyn bolady. Sondaı-aq QazAqparat saıtynda onlaın-daýys berý ótedi.

Jeńimpazdardy marapattaý jeltoqsan aıynyń sońyna josparlanǵan. Gran-prı ıegeri 2 mln teńge syıaqy alady.

Ózge jeńimpazdardyń aqshalaı júldesi:

1 oryn - 1 500 000 teńge;

2 oryn - 1 000 000 teńge;

3 oryn - 500 000 teńge.

 

Konkýrsqa qatysýshylardy qosymsha yntalandyrý úshin jalpy somasy 1 mln  teńgeni quraıtyn arnaıy syılyqtar qarastyrylǵan.

1 arnaıy syılyq - 400 000 teńge;

2 arnaıy syılyq - 400 000 teńge;

3 arnaıy syılyq - 200 000 teńge.

Baıqaý erejesimen https://kaz.inform.kz/news/contest siltemesi boıynsha tanysýǵa bolady. Ótinimder [e-mail] elektrondyq poshtasyna qabyldanady.